Press "Enter" to skip to content

Khylliap lama ka seng NPP ha Nonghyllam, rung UDP ki nongïalam

Shillong, Rymphang, 13: Sa ar taiew thik shwa ba ka Jylla kan sakhi ïa ka jingjied MDC sha ka Iingdorbar Thawaiñ jong ka Khasi bad Jaiñtia Hills Autonomous District Council, ka National People’s Party (NPP) kaba ïalam ïa ka Sorkar Meghalaya Democratic Alliance (MDA) ha ka Jylla ka la mad ïa ka jingjakhom khait hadien ba ki nongïalam baradbah ki la khylliap noh ïa ka lama jong ka National People’s Party (NPP), Nonghyllam Unit.
Ki ratbah nongïalam bahakhmat eh jong ka NPP Nonghyllam Unit ki long u President u Bah Thomas Hashah bad u Secretary u Bah Ambrius Lyngdoh. Kine ki arngut ki nongïalam jong ka NPP ki la ïalam lang ruh sa palat shispah ngut ki nongkyrshan ka NPP ban pynïasoh sha ka United Democratic Party (UDP) ha ka jingïalang pdiang burom kaba la long ha Ranikor ha ka 10 tarik mynta u bnai.
Ïa kine ki nongïalam bad ki nongkyrshan ka NPP ba wan pynïasoh sha ka UDP la pdiang
burom da u MLA ka Ranikor Constiuency, u Samla Pius Marweiñ uba long ruh u President ka UDP Ranikor Circle ha ryngkat ka jingsakhi lang jong u Bah Nasar Marweiñ u kyrtong MDC jong ka UDP na ka Langrin Constituency, ki rangbah bad ki nongkitkam jong ka UDP.
Da ka jingwan pynïasoh jong kine ki nongïalam bad ki nongbud ka NPP, ka UDP ka la nang ïoh mynsiem shuh shuh ha kane ka elekshon MDC ka ban sa long ha ka 27 tarik mynta u bnai Rymphang.
Kum ban shu kdew, u Bah Thomas Hashah u dei u nongïalam ba hakhmat eh jong u MLA barim ka Ranikor Constituency u Martin M Danggo uba la jop la saw samoi kynthih na ka tiket jong ka Seng Congress bad rem noh ha ka elekshon shiteng samoi hadien ba u la pynïasoh bad ïakhun dang shen na ka tiket jong ka NPP.
U Samla Pius haba pdiang sngewbha da ka mynsiem kaba kmen ïa kine ki nongïalam bad ki nongkyrshan ka NPP sha ka UDP, u la ong, “ka UDP ka pdiang kylluid mynsiem ïa phi baroh kiba la wan ban pynïasoh bad sha ka Party bad naduh kane ka sngi phi la long ki jong ngi bad phi la dei ban sngewtrai ïa ka party UDP. Ka jingwan jong phi ka dang pynkhlaiñ shuh shuh ïa ka UDP namarba mynta ka don ïa ka jingpynkhreh na ka bynta ka elekshon MDC ka ban sa long ha ka 27 tarik mynta u bnai.”
U la ong ruh ba lyngba ka jingïatreilang khlem jingartatien ka UDP kan ïoh kheit ïa u soh ka jingjop ha kane ka elekshon MDC.
U Bah Nasar Marweiñ u kyrtong MDC jong ka UDP na Langrin Constituency u la kyrpad ïa kine ki arngut ki rangbah bad ïa ki nongkyrshan ba thymmai ba kin ïa trei shitom lang na ka bynta ban wanrah ïa ka jingjop ba donburom ïa u bad ïa ka Party hi baroh kawei.
Shwa kane, ka UDP Umpung Unit hapoh ka jingïalam jong u Bah Nasar Marweiñ bad u Bah C. Nongbri kiba long ki nongïalam jong ka UDP Ranikor Circle ki la pdiang burom ïa u Bah Strai K. Wanniang lem bad ka kynhun kiba don kumba 40 ngut tam kiba dei na ka shnong Umpung.
U Bah Strai K. Wanniang u dei u nongïalam baradbah jong ka NPP na ka shnong Umpung, Moilam bad kiwei kiwei de ki shnong ba Marjan.
Ki la don ruh ki nongshong shnong na ki shnong khappud bad na ka thaiñ Warsanlyngdoh bad kiwei kiwei de ki shnong kiba la wan pynïasoh sha ka UDP ha kaba la pdiang sngewbha da u MLA bad ki nongïalam jong ka UDP Ranikor Circle.