Press "Enter" to skip to content

Lynshop ka prie bad pynhiar ha Nongstoiñ, 600 ngut pang ki khyllung

Nongstoin, Rymphang, 13: Ka jingpang prie bad pynhiar ka la lynshop syndet syndet ïa ki paidbah jong ka thaiñ Nongstoiñ khamtam ïa ki khyllung bad khynnah ha kaba ka Nongstoin Civil Hospital ka la dap smam da ki nongpang bad wat ki khyllung ruh ki la hap ban thiah ha baranda.
Katkum ka jingtip ba la ïohlum la ïathuh ba kane ka jingpang ka la sdang ban kynrei bha naduh u bnai ba ladep ha kaba da ki spah ngut ki nongpang khamtam ki khyllung ki la hap ban wad ïa ki jingsumar bakyrkieh.
U Dr. Wompher Langbang uba la pyntbit kyrpang ban sumar ïa ki khyllung bad khynnah ha Civil Hospital, Nongstoiñ u la ïathuh ba ka jingpang prie bad pynhiar ka long kaba ma bha namar ka ktah stet bha ïa ka koit ka khiah khamtam ïa ki khyllung khynnah.
“Ki kmie ki kpa ki dei ban shim ka ka jingkitkhkieh ban wanrah kyrkieh ïa ki khun ki kti jong ki sha Hospital lada ki ïoh ïa kane ka jingpang khamtam ha kane ka por ba ka aiom ka la sdang ban kylla bad ba ki khniang jingpang ruh ki ïohbor bha,” la kyntu Dr. Langbang.
U la ong ba kane ka jingpang ka jur bha mynta la kumba lai taiew bad palat 600 ngut ki khyllung khynnah ki la wan ban shah sumar ha kane ka hospital.
U la la da ka jingtrei shitom ki doktor bad ki Nurse la lah ban ai ïa ka jingsumar ba biang ïa baroh kiba la wan sha hospital. Kane ka jingpang ka la ktah bha ïa ki shnong kiba don hapoh ka sor Nongstoiñ kynthup ïa ka Shnong Nongpyndeng, Pyndengrei bad kiwei kiwei.
U la kyntu ïa ki paidbah, khamtam, ïa ki kmie ki kpa kiba don ki khyllung bad ki khunrit ba ki dei ban long kiba husiar bad kiba phikir ïa ka bam ka dih ha ing ha sem kumjuh ruh ha ki jaka khawai dawai khnang ban lait na kiba kum kitei ki jait jingpang. Ha kajuh ka por u la ai jingmut ïa ki kmie ki kpa ba ki dei ban lehkhuid ïa ka bam ka dih bad ïa ki tiar ki tar ba ki pyndonkam ban aibam ïa ki khyllung bad ki dei ban shet bha ruh ïa ka um shuwa ban dih.