Press "Enter" to skip to content

NGI LA JOP ÏA KA JINGÏALEH HYNREI YM ÏA KA THMA CAB

– H.T.Wells
Shillong: Hadien shibnai tam naduh ba ka sorkar NDA ba la lamkhmat da ka BJP ka la pass ïa ka Citizenship Amendment Bill 2016 ha Lok Sabhaha ka 8th Kyllalyngkot 2019 ïa kaba yn sa phah pat sha ka Upper House ne Rajya Sabha ban pynlong Aiñ,ka jingkhihwin ka sdang ha kane ka thaiñ shatei lam mihngi jong ngi namar ka jingpyrshang jong u Prime Minister Narendra Modi ban ïuhroit ïa ka Hok jinglong traishnong jong ki briew ha kane ka thaiñ hi baroh kawei da ka jingthmu ban pynlong nongindia ïa ki poi-ei Hindu kiba wan na Bangladesh bad nawei.Ban kup durbula ïa katei ka jingthmu, u Narendra Modi u la pyrshang ban pynbieit ba yn pynlong nongindia wat ïa ki khristan ba wanpherwir na Pakistan bad Afghanistan ruh hynrei haba kut, ka paw ba dei tang ka buit barieh ban pynlong Hindu state noh kloi ïa ka India kaba la kular da ka BJP ïa ka Rashtriya Swayamsevak Sangh (RSS) kaba long ka nongaimynsiem jong ka.
Kaba sngewtynnad eh ka long ba ka ka sorkar u Modi ka la hap ban pyntdong hi toiñ ha ka sur jong ki paidbah jong kane thaiñ North East mynta ka sngi haba ka jingpyrshang ban wanrah ïa katei ka Bill hapoh Rajya Sabha ka la pulom naduh mynhynnin ka sngi bad ka kut syndon mynta ka sngi namar ka jingther jong ki Opposition parties ka sorkar NDA ïa kaba u Chairman jong ka u Venkaiah Naidu uba long ruh u Vice President jong ka ri India u la hap ban pynwai noh khlem buh por  (Sine die) ïa ka sien shong durbar jong katei ka House.Hangne la paw shaikdar ba “ka Sur u paidbah ka dei shisha ka sur Blei”.Ym lah khlem da ai burom ïa ki rangbah ba la tur ha madanthma naduh basdang kum ki jong u Bah Samuel Jyrwa President jong ka North East Students Organisation (NESO),u Chief Adviser ka AASU u Samujjal Bhattacharya,U Anup Chetia General Secretary barim ka ULFA bad kiwei.Ka jingkmen mynta ka long ba u samla jong ka ri jong ngi, u Bah Samuel Jyrwa u la shim ïa ka lyngkor bakhia ba leit tour sha kylleng ki jylla jong kane ka thaiñ bad wat shaduh Delhi ruh ban ïa kynduh bad kiwei pat ki nongïalam jong ki political parties khnang ban poi sha ka thong.U samla rangbah ba la don ka experience naduh ka Khasi Students Union,u Bah Samuel u leit ban tynruh haduh ka skum basyiad jong u Sanowal Chiefminister ka Assam.Ka jingïakhih ha ka jingshisha la sdang lypa naduh ka por ba ki wan ki panel jong ka Joint Parliamentary Committee ban twad jingmut na ki Jylla bapher bapher halor ka jingthmu jong katei ka CAB.Ki samla jong kane ka jylla ryngkat lang bad kiwei pat ki la ai ïa ka dorkhas bakhlaiñ kum ka dak ban pyrshah jur ïa katei ka jingthmu,phewse,ka jingphah ïa ki dkhot jong ka JPC ka dei tang ban pynthame ïa ki paidbah.Nangta,haduh kine ki sngi bakhatduh lei,ka jyllipdeng (epicenter) jong ka jingïakhih ka dei ha Ema market Complex jong ka Manipur ha kaba ki longkmie kumba ki pyrshah ïa ka aiñ Yakjakor AFSPA, kumta ruh ki trei tyngeh ban shahthngan khlem pud hapoh katei ka ïew kat haduh ba ka sorkar Manipur ka la hap ban siat teargas ïa ki ban pynduh noh shipor ïa ka internet service bad kiwei pat ki lad pathai khubor kum ka lad ban tehlakam ïa ka jingklang jong ka jingïakhih. Ki dei ki ‘riewdapkynthei shisha,kat haduh ba u Chief minister Nongthombam Biren Singh u la hap ban her kyrkieh sha Delhi ban phah pynsangeh ïa u Union Home Minister Rajnath Singh na kaba buh ïa katei ka Bill ha Rajya Sabha,lym kumta ka sorkar jong u ka la sep artad ka sngi namar la kyrshan da ka NPP.
Nalor nangta,u Chief Minsiter jong ngi u Conrad Konkal Sangma ruh u la maitlynti nakhmat ïa baroh ki Chief Minister jong ka North East kynthup ruh ïa kiwei pat ki nongïalam kum ki jong ka AGP bad kiwei.Bun ki nongïalam ka North East ki ai burom sha u Conrad Sangma ba um salia ban weng noh ïa ka jingsynrop bad ka BJP lada pynlong aiñ ïa ka CAB,dei hangne ba arngut ki Chief Minister jong ka BJP, kata; Arunachal Pradesh bad Manipur ki hap ban leit pyrshah lang sha Delhi. Hynrei kaei kaba sngewsammut ka long ba nalor ba la pulom, u Himanta Bishwa Sarma, Finance Minister ka Assam bad u Biplab Kumar Deb Chief Minister ka Tripura, tang khyndiat kynta hadien ba la pulom katei ka Bill, ki la ai burom sha ki paidbah wat la u Himanta u dang byrthen ban wanrah biang ïa ka Bill ha Parliament. Ki long thik kum uto u myrsiang ba la shah shaiñ tdong ha ki paidbah hadien ka jingleit tuh jong u ban pynbieij ïa ki paralok da kaba ong “to ïashaiñ lem phi ïa la ki tdong, wow ! ka jingsngewpyngngad kaba kat katta”, tang ban kyrda na ka jingsawkyrang jong ka jinglehraiñ.
Hooid ki seng bapher bapher kum ka KSU, ka HYC hapoh ka shatri CoHSO bad kiwei ki don la ka jong ka bynta ban pynpulom ïa katei ka jingthmu jong ka sorkar India ban ïuhroit ïa ki ritpaid jong kane ka thaiñ.Hynrei kumba kynthoh u Samujjal Bhattacharya, ka jingïaleh kam pat wai,ym pat dei ban shong klikti namar lada ka BJP kan wan biang ha ka bor hadien ka election MP 2019 ka lah ban phrung biang ïa ki tyrsim ba ijli jong ka ban pynurlong ïa katei ka jingthmu.
Ñiuma, ïa mynta ngi la hun halor ka jingjop, kumba u Bah Samuel Jyrwa u ai burom ïa ka kum ka jingjop jong ki paidbah hynrei ka jingïaleh kam pat wai.Ka burom ka leit ruh sha kito ki samla trai muluk jong ka Tripura kiba la shah siat ha kane ka jingïakhih CAB. Ki nongshongshnong ki dei ban peitngor halor kane ka jingphohsniew ban pynkylla Hindu state da kaba khñiot jubor ïa ka Hok bad ki Deiti jong ki trai-ri trai-muluk, kat haduh ba katei ka Bill yn thang noh syndon sha jaka thehñiut jong ka Parliament.
(Phi lah ban ïakynduh bad u nongthoh lyngba ka : [email protected])