Press "Enter" to skip to content

Pan jingkyrshan ka UDP ban ïoh synshar ki Seng riewlum ha KHADC

Nongpoh, Rymphang, 13: Ki heh nongïalam ka UDP ki kynthup naduh u Bah Jemino Mawthoh, General Secretary, u Bah Bindo M. Lanong, Senior Vice President, u Bah Donbok Khymdeit, President ka UDP na Ri Bhoi bad kiwei kiwei ki nongïalam hynne ka sngi lem bad ki heh nongïalam ka HSPDP ba kynthup ïa u Bah Rinikton Lyngdoh, MLA ka HSPDP na Mawkyrwat bad u Bah P.B Sylliang, President ka HSPDP Ri Bhoi ki la hiar sha Umroi Constituency ban ban pynjop ïa u Bah F.D Ramsiej, kyrtong ka UDP na Umroi Constituency ha kane ka election MDC.
Ha kane ka jingïalang la pynskhem ruh ïa ki nongïalam ka UDP Umroi Circle ba kynthup ïa u Bah F.D Ramsiej kum u President, u Bah F.M Mawphniang, Working President, u Bah S. Marbaniang, Senior Vice president, u Bah Arister Rynghang Asher Makri bad u Bah P. Muktieh kum ki Vice President, u Bah G.S Shadap, General Secretary, u Bah Ailong Pariat, Joint Secretary, u Bah S. Shylla, Treasurer bad kynthup kiwei kiwei ki nongïalam.
Nalor kitei ki nongïalam ka UDP central body bad na ka District, u kyrtong ka UDP, u Bah F.D Ramsiej ha kane ka sngi u la ïoh mynsiem bad ka jingkyrmen ruh ban jop ha kane ka election MDC, namar palat hajar ngut ki paidbah ki la ai ka rai ban kyrshan tyngeh ïa ka UDP bad khamtam ba u kyrtong MDC ka UDP un poi sha ka thong jong ka jingjop.
Ha kane ka sngi ka la jingkren naduh u Bah Dobok Khymdeit kum u District President ka UDP, u Bah Jemino Mawthoh, General Secretary ka UDP Sengkmie, u Bah Bindo M. Lanong Senior Vice President ka UDP Sengkmie bad kynthup ruh u Bah Renikton Lyngdoh, MLA ka HSPDP na Mawkyrwat ha kaba ki la pynmih kawei ka sur ba ka HSPDP bad ka UDP kin trei ryngkat na ka bynta ban ïoh synshar ha ki ar tylli ki District Council kata ha KHADC bad JHADC hadien kane ka election MDC.
Kitei ki heh nongïalam ka UDP bad HSPDP haba kren ha kane ka jingïalang ïalap election MDC na ka bynta u kyrtong ka UDP, u Bah F.D Ramsiej ki la pan ka jingkyrshan kaba radbah na ki paidbah ba mynta ka la dei ka por bad ka ïa ba ka Party riewlum kan ïoh bat ïa ka jingsynshar ka ban sdang shuwa mynta na ka District Council.
Ki la ong ruh ba ka party riewlum kum ka UDP bad ka HSPDP ki wan na kajuh ka thymmei bad ka nongrim bad ka thong hi ka long ban trei kyrpang na ka bynta ka daw bah ka jaid bynriew ha kaba mynta ka jaid bynriew ka la don ha tmier na ka jingïoh synshar ki party kiba na shabar kiba ym tip satia ïa ka dang ka duh jong ka jaid bynriew.
Ki la kren ruh halor ka jingthmu ban pyntreikam ka BJP ïa ka CAB kaba mynta ki dang ïakhun ban pynlong ain sa ha Rajya Sabha bad kiwei kiwei ki ain kiba thmu ban pynthlot bor ïa ka jaid bynriew rit paid bad ban ïada ïa ka hok longtrai ki rit paid khamtam ha ka jylla shatei lam mihgngi la donkam ba ki paidbah kin pynkup bor ïa ki party riewlum kiba sngewthuh khambha ïa ka jingeh ki paidbah bad khamtam ban ïada ïa ki riti ki dustur, ki khyndew ki shyiap bad kiwei kiwei ki bynta ban pynkhlain bor ïa ka jaid bynriew.
Naduh u Bah Bindo M. Lanong, u Bah Jemino Mathoh bad u Bah Renikton Lyngdoh ki la kren shai ruh sha ki paidbah ba ka daw kaba la pynlong ïa ka UDP bad ka HSPDP ban ïa trei rygnkat ka dei namar ba ki ïohi ba ka jaid bynriew ka la donkam kyrkieh ban saindur thymmai bad ban saindur thymmai ïa ka jaid bynriew ka dei tang ha ka bor ki paidbah ba kin pynjop donburom naduh kane ka election MDC bad kumjuh ruh ha ka MP election bad wat ha ka MLA election ka ban sa wan ha ka jylla.
Namarkata, khnang ban wan ka jingkylla ha ka liang ka synshar ka khaddar ha ka jylla ki la buh ka jingkyrpad kaba jur sha ki paidbah ka Umroi bad kumjuh hi ruh wat ha Rilum Khasi Jaintia ba ki paidbah ki la dei ban ai jingsneng ïa kiwei ki party National bad ban ai ka jingkyrshan ïa ki party riewlum kiba don shisha ka thong ban ïa khun na ka bynta ka daw bah jong ka jaid bynriew.