Press "Enter" to skip to content

Sohsat ki UROV ban ngam jylliew ba jngut ka um hapoh krem dewïong

Khliehriat, K’lyngkot, 13: Ki shipai Indian Navy ki la mad jingeh ban pynngam jylliew ïa ki Underwarter Remote Operation Vehicle (UROV) ban wad ïa ki lanot ba dang sahkut haduh mynta ha ka krem tih dewïong ha Ryngksan namar ka jingjngut shaba palat ka um hapoh kane ka krem.
Mynta ka sngi balang kane ka jingjia ka la kynjoh sha ka ar bnai kynthih ba 15 ngut ki nongtih dewïong ki la shah tep im ha ka jingkhyllem ka krem tih dewïong ha Rynksan ha ka 13 tarik u bnai Nohprah, 2018.
Naduh ka sngi ba la ïohsei tang ïa kawei ka metïap napoh katei ka krem, ki kynhun ai jingïarap haduh mynta ki dang ïai bteng ban sei ïa kiwei pat kiba dang sahkut hapoh kane ka krem da kaba tan ïa ka um da ki phew lak litar ha ka shi sngi.
Ka thymmei khubor ba la ïohlum ka la ïathuh ba ki shipai ka Indian Navy ki la ïakynduh mawsiang namarba ka Underwater Remote Operation Vehicle (UROV) kam lah satia ban ngam pynngam shaba kham jylliew namar ka jingjngut shaba palat jong ka um hapoh kane ka krem kaba dap da ka jingjakhlia, nalor ki sla, ki jaiñ jot, ki tyllai jot watla ki kynhun ai jingïarap bunsien ki la ïaleh ban pynkhuid ïa ka um hynrei ym i don jingseisoh eiei ruh em.
Watla ïa ka um ym shym lah satia ban pynduna, hynrei ka jingtan um na ki thliew dewïong ka dang ïai bteng kumba ju long ha kaba ki mashin tan um jong ka Coal India ka dang ïai bteng ban tan um haduh 4590000 litar hapoh ka 34 kynta, ka Kirloskar ka la pyllait ïa ka um haduh 5760000 litar hapoh ka 32 kynta, ka KSB ka pyllait ïa ka um haduh 6336000 litar hapoh ka 32 kynta katba ka kynhun ki NDRF ki dang ïai bteng ban ai ka jingïatreilang bad kiwei kiwei ki kynhun ba don ha Ryngksan.