Press "Enter" to skip to content

Ther ka FKJGP ba kylla ki Traffic Booth ki Pulit sha ki Money Collection Booth

Shillong, Rymphang 13: Ka seng Federation of Khasi Jaiñtia & Garo People (FKJGP) Sengkmie, kala ther tyngeh ïa ka Tnad Megha laya Police halor ka jingkynnoh ba bun ki Police Traffic Booth kila kylla long pynban ki Money Collection Booth (ka jaka lum pisa) jong ki Pulit.
Ka FKJGP kala ther ïa kane halor ka jingkynnoh ba ka don ka jingkhrong pisa be-aiñ jong ki Pulit ka Mawlai Police Station bala lap da ki dkhot ka Seng, kaba jia hynne ka sngi ha Police Traffic Booth jong ka surok No-Entry ba don ha Mawlai Mawiong.
“Ngi kwah ban kylli na ki Bor Pulit balei ba ïa ki Police Traffic Booth la pynkylla sha ka Money Collection Booth haba ai nuka ïa kaei kaba ju jia ha ki thaiñ Garikhana, Anjalee Petrol Pump bad kiwei kiwei ki jaka” ong u Bah Reginald Thabah, Assistant Information Secretary ka FKJGP Sengkmie.
Kat kum ka kyrwoh ba u phah, une u Nongïalam ka FKJGP ula kynnoh ba hynne ka sngi balang por 2 baje, ki Dkhot ka Seng ha ka jingïalam jong u(Reginald), kala lap ïa ka jingkhrong pisa be-aiñ da ki arngut ki Pulit Sub Inspector bad kumba 6 ngut ki Pulit langrut jong ka Mawlai Police Station Traffic Branch, kiba bat ïa ki kali kiba wan kiew na ki thaiñ Bhoi ha surok No Entry, Mawiong.
Haba kynnoh ba laingut ki Pulit Langrut kila bunkam ban pynieng kali ban lum pisa, u Bah Reginald u ong “Arngut ki Pulit Sub Inspector bad lai ngut ki langrut ki ïashong ha dukan bad iabam ja. Ki Nongniah kali ki hap ban wan siew pisa ha uwei na kine ki Sub Inspector uba la lum thup ïa ka pisa ha ka tupia Pulit ba u phong”.
Haba pyntip ba kum u Nongïalam Sengbhalang ula hiar ban kylli ïa kine ki Pulit ba ki bat kali bad lum pisa, u Bah Reginald u ong ba ka jubab ba mih na kine ki Pulit ka long ba la bat ïa ki kali namar ka jingbym don kot don sla. U ong haba kylli pat ba lada siew da ka pisa yn pyllait beit, la kynnoh ba uwei u Sub Inspector Khasi ula jubab ba ju pyllait beit. Une u Nongïalam Sengbhalang u ïathuh ba kaba thamula ka long ba kine ki Pulit kim shym la ai receipt satia na ka bynta ka pisa ba siew sha ki da kine ki kali bad haba kylli bniah, la ïoh ïa ka jubab ba ki dei ki paralok.
“Nga la tohkit bniah ïa kine ki Pulit bad dei ha ka por ba nga phone ïa ki Lad pathai khubor ba kine ki briew phone uniform khaki kila phet lut na kane ka jaka” ula ong haba ïathuh ba ha kane ka jingïaphet, ula ïoh ban kylli khatduh na uwei u Langrut Khasi uba la kam ba kane ka pisa ba lum kan sa leit sha Ïingkashari.
“Thamula! kumno kane ka pisa kan leit sha Ïingkashari haba tang ka receipt ruh khlem ai. Kumno ka kashari kan tip ba ki ïoh lum kumno?” buh jingkylli u Bah Reginald.
Haba kynthoh ba kane ka jinglum pisa be-aiñ jong ki Pulit Traffic kam dei satia kaba dang jia tang mynta hynrei ka dei kaba la ujor da kiba bun balang sha ka Seng, u Bah Reginald ula ong “Ki Pulit Traffic ba don ha Anjalee Point lei ju bat jubor ïa ki kali kit briew ba leit sha ki thaiñ Nongkyndong na ka daw ba ki kit ïa ki mar ki kata ka jong ki. Ngi kwah ban kylli hato da wan siew sha Iew na ka bynta ka Ïing ka sem, ym lah seh ban kit mar ha ki kali ba shong ne hap ban wan kit da ka trok ne pick up”.
Haka kyntu ïa ki paidbah ba kin mih shakhmat ban nym ailad ïa ki briew ba bat aiñ ba kin pynkheiñ aiñ, une u NOngïalam Seng bhalang ula buh jingkylli ïa ki bor ba halor balei ba ki Pulit Traffic kim ju dap ïa ka tulop ba ki ïoh.
“Ngin sa leit ïakynduh ïa u Myntri kam pohïing ka Jylla ban ïakren halor ki jingpyndik jong ki Pulit Traffic ïa ki paidbah” ula ong.