Press "Enter" to skip to content

Thung tynrai dieng ka Topcem bad ka MCL ha Thangksai

Khliehriat, K’Lyngkot, 13: KaMeghalaya Cement Ltd bad ka Topcem ki ar tylli ki kompani pynmih dewbilat ha East Jaiñtia Hills Distict hynne ka sngi ki la rakhe ïa ka sngi pynneh mariang da kaba thung ïa ki tynrai dieng ha ka shnong Thangskai.
Ka jingthung ïa kine ki tynrai dieng ka long kum shi bynta ban ïasnohkti lang bad ka ri India baroh kawei ha ka jingrakhe ïa ka ‘Mines Environment Mineral Conservation Week 2018-2019’ kaba la sdang naduh ka 11 tarik mynta u bnai.
U KG Singh, u Convenor jong ka Inspection Team, haba kren ha ka jingïalang shwa ban thung dieng u la ong, ‘ka long kaba shisha ba ngi donkam ïa ka lyer kaba khuid, ka um kaba khuid bad ban pynneh ïa ki dieng ki siej ha ka mariang.
U la ai ka jingïaroh ïa ka Topcem kaba la ïatreilang bad ka Meghalaya Cement Ltd ban pynneh pynsah ïa ka mariang.
“Kane ka company ka la shimkhia shisha ban thung ïa ki diej ki siej ban ïoh ïa ka lyer kaba khuid bad kumjuh ruh ka mashin kiba biang ban pynduna ïa ka jingjakhlia ha ka ka lyer bad ka um,” u la ong.
U Umesh Kumar, u General Manager u la ïathuh ba tang hapoh u snem 2018-2019 la lah ban thung haduh 50,000 hajar ki tynrai dieng ha kylleng kylleng ki jaka halor ka jingthmu ban wanrah ïa ka lyer kaba khuid bad kumjuh ruh ban pynneh pynsah ïa ka jingjyrngam ha ka mariang sawdong.
U R.K.Pareek u hehduh jong ka Topcem, u la ong, “da ka mynsiem kaba kmen eh ngi la kloi ban ïashim bynta lang ha kane ka prokram pynneh mariang kaba shitaiew lynter. Kumba ka mariang ka ai ha ngi ïa ka jingim, kumta ruh ngi donkam ban ai ka jingim bad jingkyrmen ïa ka mariang.”
Kiwei kiwei kiba ai jingkren ki long u Sudip Bhattacharya,na ka CCI, u Chadrachekar Sarma na ka ACL Dalmia, u Pranab Sarkar, Senior Foremen Geology Planning, u Pankaj Prasad, Engineer ka HEMM, u NNarayan Reddy, Mines Manager bad kiwei kiwei. Ha kane ka sngi la sam ruh ïa ki khusnam sha ki nongjop ha ka jing ïakop thoh slogan, dro dur, thoh poetry bad kiwei kiwei.