Press "Enter" to skip to content

111 klur ioh ki lai ADC na ka sorkar pdeng, 52 klur tang ha KHADC

Shillong, Lber 04 : Ki lai tylli ki Autonomous District Council jong ka jylla ha ka sngi Nyngkong jong ka taïew ki la ioh pdiang ia ka song jingiarap pisa kaba haduh 111 klur na ka sorkar pdeng ba la tip kum ka Special Plan Assistance (SPA).
Na katei ka 111 klur, ka Khasi Hills Autonomous District Council (KHADC) kan ioh haduh 52 klur katba ia ka 59 klur kaba sah pat yn iasam hapdeng ka Jaiñtia Hills Autonomous District Council (JHADC) bad ka Garo Hills Autonomous District Council GHADC).
“Hynne ka sngi ngi la ioh pdiang ia ka order ba ngin ioh pdiang ia ka jingiarap pisa kaba 111 klur tyngka na ka sorkar pdeng, ka Special Plan Assistance,” ong u Chief Executive Member
ka KHADC, Bah HS Shylla haba kren bad ki lad pathai khubor.
Katkum ka jingiathuh jong u, ka jingioh ia katei ka jingkyrshan pisa na ka sorkar pdeng kadei lyngba ka jingtrei shitom jong ka Executive Committee jong u ha ki khyndiat bnai ba ka ioh ban bat ia ka bor synshar.
U CEM u la ong ruh ba katei ka skim SPA ba ki ioh mynta na ka liang ka Executive Committee ba thymmai ka lah ban pyndonkam na ka bynta ban pyndap pynbiang ia ki jingdonkam jong ka Council bad kaba sah pat ki lah ban pyndonkam na ka bynta ka skim sha ki MDC.
Na ka liang u Bah Shylla u ai ka jingkitbok ia baroh 29 ngut ki MDC ba thymmai ryngkat ka jingkyntu ba kin buddien ia ki Bill ba wanrah bad mynjur da ka Council. Ha kajuh ka por u pynpaw ruh ka jingbynñiaw namar na baroh ki 11 ngut ki Executive Member jong u kiba don bynta ban thaw ia ki Bill, tang arngut kiba la jop biang kata tang u Bah Latiplang Kharkongor na Nongthymmai bad u Bah Victor Ranee na Jirang constituency.
Halor ka jingkylli, u Bah Shylla u la ong, “Nga kwah ba ka Executive Committee ban wan kan buddien ia kitei ki Bill khamtam haba ki party ba thaw ia ka bor synshar kidei kajuh bad ka sorkar MDA ha ka jylla.”
Da kaba kitbok ia u Bah Teiñwell Dkhar uban shimti ia ka shuki CEM ba thymmai jong ka Council, u Bah Shylla u la ong ruh ba ka EC ba thymmai ka donkam ban pynim biang ia ka jingkyrshan ia ka Council na ka bynta ban pynkhlaiñ shuh shuh ia ki Enforcement Wing. U la ong ruh ba lada ki sengbhalang ki ioh ban bat ia ki nongkhaïi beaiñ khlem Trading License balei pat ki enforcement jong ka Council kim lah.
“Donkam ban shimkhia ia kane ka bynta ban pynkhlaiñ ia ki enforcement khnang ba ka Iewduh kaba ki ñiew kum ka pliang ja jong ka jaidbynriew ki nongwei kin ym iohlad. Lada ym lah ban leh kumta ka Jaidbynriew kan kynduh ia ka jingeh kaba khraw,” u la ong shuh shuh.
Lah ban kdew hangne ba ka jingjied ia u CEM ba thymmai jong ka KHADC kan long ha ka 8 tarik mynta u bnai katba ka jingpynsmai ia kitei ki MDC ba thymmai pat kan long ha ka 06tarik.