Press "Enter" to skip to content

Bteng ka jingkhring ka Nabon ïa ki paidbah

Shillong: Ka phlim Nabon, kaba la pyni paidbah naduh ka 26 tarik u bnai baladep ha Dorbar Hall, Mission Shillong, ka la ïai bteng ban khring ïa ki paidbah naduh katei ka sngi ba la pyni ïa ka.
Wat lada ha ka sngi bas dang, kata ha ka 26 tarik ha ka jingpyni ha ka por 11 baje mynstep nad 1 baje mynsngi, kiba wan peit kim shym la poi spah, hynrei ha katei kajuh ka sngi, kata ha ka por 3 baje bad 5 baje janmiet, ki paidbah ki la dap smam ïa ka Hall. Ha ki sngi kiba bud, kata ha ka 28 tarik, ki paidbah ki la nang ïa bun bad don ruh kiba la wan peit arsien ruh.
Ha ka 1 tarik, namar ka jingbun ki paidbah kiba wan peit bad namar bun ki bym ïoh ticket shuh ban peit ïa ka
jingpyni kaba khatduh ha ka por 5 baje janmiet, la hap ban bteng ka jingpyni ha ka por 7 baje. Haba la bteng biang ka jingpyni ha ka 4 tarik, ka Hall ka la dap mam baroh shi sngi bad wat lada la buh ban pyni haduh ka por 5 baje janmiet, la hap ban pynjlan biang sa sha ka 7 baje bad ki paidbah ki la shlei mam ha ka Hall.
Namar ka jingdawa ki paidbah kiba bun, na ka liang ka Jingïaseng Samla KJP Synod Sepngi, wat lada ka la buh ban pyni ïa kane ka phlim tang haduh ka 6 tarik mynta u bnai, hynrei la hap ban pynjlan biang sa sha ka 7, 8 bad 9 tarik mynta u bnai bad la hap ban pynbun shuh shuh ïa ki sien pyni kata na ka saw sien sha ka san san sien. Kata ha ka por 11 AM, 1 PM, 3 PM, 5 PM bad 7 PM naduh ka 7 haduh ka 9 tarik.
Kaei kaba la lap na ka jingpyni Ïa kane ka phlim, ka long ba bun ki paidbah ki la wan peit arsien lai sien. Nalorkata ruh kiba bun kiba wan peit kidei ki khynnah samla.
Kane ka phlim, ka la ktah ruh ïa ka jingmut jingpyrkhat bad jingsngew jong kiba bun. Kawei ka nonghikai skul bym dei Khasi, haba la kylli kaei ka jingsngew jong ka halor kane ka phlim, ka la ong, “Ngam lah ban pynïaryngkat (compare) ïa kane ka phlim bad ki phlim na Bollywood ne Hollywood, namar kane ka phlim ka long kaba pher bad phylla haduh katta katta”.
Ki don ruh kiba la pynpaw ba kane ka phlim kan ktah khamtam ïa kiba la long Khristan ba kin nang pynskhem shuh shuh ïa ka jingngeit jong ki bad ki kyrmen ruh ba kane ka phlim kan ktah ïa ki bym pat ngeit ruh.