Press "Enter" to skip to content

Buh u Lat 6 tarik ban bam smai ki MDC, 8 ka elekshon Chairman ha KHADC

Shillong, Lber 04: U Lat ka Jylla u Tathagata Roy, ula buh ïa ka 6 tarik Lber kum ka sngi ban bam smai ki 29 ngut ki MDC ba thymmai jong ka Khasi Hills Autonomous District Council (KHADC) bad 8 tarik kum ka sngi pynlong ïa ka elekshon jied Chairman jong ka Council.
Kat kum ka Notification bala pynmih hynnin ka sngi, u Lat ka Jylla ula khot ïa ka Dorbar ba nyngkong jong ka KHADC ha ka 6 tarik por 11 baje na ka bynta ban pynbam smai ïa ki MDC ba dang shu shah jied thymmai. Kine ki DC kim bam smai kat kum ka Rule 24 jong ka Assam & Meghalaya Autonomous District (Constitution of District Council) Rules, 1951.
U Lat ula pynbna ruh ba ka elekshon ban jied Chairman jong ka Council kan long ha ka 8 tarik Lber hapoh ka Council Hall ha ka por 11 baje mynstep. Ïa kine ki Dorbar yn pynïaid da ka Deputy Commissioner ka East Khasi Hills kum ka Lamphang.
Ka kynhun synrop Peoples Democratic Alliance (PDA) jong ka NPP bad ka Regional Democratic Alliance (RDA) jong ka UDP, kin thaw ïa ka Executive Committee ba thymmai hapoh KHADC.
Ka PDA ka kynthup ïa 7 ngut ki MDC ka NPP, 1-PDF, bad arngut ki MDC shimet katba ka RDA ka kynthup ïa ka UDP-7 ngut bad HSPDP-2 ngut. Ka NPP kala jied ïa u General Secretary i/c Khasi Jaiñtia Bah Pynshngaiñ N Syiem, MDC ka Mawkhar-Pynthorumkhrah ban long u Nongïalam ka Parliamentary Party (PP Leader) hapoh ka Council.
Na ka liang ka UDP kala rai ban jied ïa u Bah Teinwell Dkhar MDC ka Shella Constituency ban shimti ïa ka jinglong Nongïalam hapoh ka Council bad ban shimti ïa ka shuki CEM ba tang shisnem katba ïa ki 4 snem ba sah, la pyniabynta hapdeng ki arngut ki MLA barim kata u MDC ka Sohra Bah Titostar Chyne bad u MDC ka Jaiaw Bah Paul Lyngdoh ki ban sa shimti mar arsnem ïa ka shuki CEM.