Press "Enter" to skip to content

Diaw ka KSU Ranikor ïa jingdkoh treikam ka SBI, CHC bad BSNL

Mawkyrwat, Lber 04: Ka Khasi Student’s Union (KSU) jong ka Ranikor Border Area Unit ka pynpaw ïa ka jingsngewdiaw halor ka jingduna ki nongtrei hapoh State Bank of India, bad jingdkoh ki rukom treikam hapoh CHC Ranikor bad ka kumjuh jong ka company BSNL kaba don ha Ranikor kaba la wan rah jingeh shibun ïa ki paitbah katei ka thaiñ.
Ha ka kyrwoh khubor ba la phah da u samla Andy Marwein, President KSU Ranikor Border Area Unit ula ong ba ki paitbah jong ka thaiñ Ranikor ki mad shibun ki jingeh namar tang ban plie ïa ka account ka shim por da ki bnai ban ïoh ïa ki passbook bad ban sei pisa ruh ka shim por haduh 3 ne 4 kynta ha kaba kane ka ktah shibun ïa ki paidbah ban ïoh ka pisa namar ka jingduna ki nongtrei ha kane ka bank. Shuh shuh ula ong ruh ba na ka liang ka seng KSU ka dawa ruh ba kane ka bank ka dei ban plie bank noh ha ka sngi balang namar kane ka bank naduh u snem 2002 ka la sdang ban khang bank ha ka sngi balang. “Ka daw ba kane ka bank ka khang namar ka jingduna ki nongtrei”, bynrap u bah Marweiñ.
Ym tang katta na ka liang une u nongïalam ula ong ruh ba katkum ka jingujor na ki paitbah la shem ïa kiba bun ki jingdkhoh ha ki rukom treikam ha kane ka bank ha kaba naduh ki kor ATM, ka bording, ka jingduna pisa bad kiwei kiwei ïa kaba ka wanrah jingeh shibun ïa ki paitbah kham tam kiba wan na jngai kum na Maheshkola, Kulang, Khonjoy, Langpa bad ki paidbah ki hap ban sah haduh 2 ne 3 sngi tang ban pyndep kam ha kane ka bank, ula bynrap. Ka seng ka pynpaw ruh ka jingsngew bitar halor ka jingbym don ka doktor bniat bad nongai dawai Pharmacist hapoh ka CHC Ranikor mynta la kum 2 snem bad khlem shem lah wan trei hynrei ka seng kam kwah ban pynpaw kyrteng ïa ka jong kane ka doktor bad u nongai dawa pharmacist. Ha kaba ïadei bad ka company BSNL na ka liang ka seng ha ka 22 tarik mynta u bnai ka ai por ban pyndep bad pynïoh network noh ha Rajaju ïa kaba ka la ban thung ïa u tower naduh u snem 2005 hynrei tat haduh mynta kane ka company BSNL ka khlem la trei kam bad ha Ranikor mynta la 2 bnai une u tower u ïeng khlem network.
Kumta ka Seng KSU ka dawa ba dei ban pyndep noh, lem kumta dei ban weng noh mardor ïa kine ki tower ki bym trei namar ka jingkthah ym tang ki paitbah hynrei wat ïa ki office sorkar ruh kumjuh. Ha kaba ïadei bad kine ki jingeh, jingkordit jong ki paidbah, kum ka Seng KSU kan ym shong kli kti hynrei da ka mynsiem jingkitkhia bad ka jingkitkhlieh ïa dong ka thaiñ ka pynpaw ha ki bor ba hajrong kum u nongmihkhmat ban un sngewbha ban ïarap ïa ki jingduna bad ki jingeh jong ka thaiñ bad ka seng ka khmih lynti ba da ka jingïarap jong ki bor ba halor kan long ka jingïohnong jong u paitbah kane ka thaiñ hi baroh kawei.