Press "Enter" to skip to content

Hato yn pyndem ka NPP ha ka UDP sa ha ka elekshon MP?

Shillong: Ka Seng National Peoples Party (NPP) ha kane ka elekshon MDC, ka la jop khambun ban ïa ka Seng United Democratic Party (UDP). Ha KHADC ka NPP ka jop 7 ngut, ka UDP pat ka jop 6 ngut. Ha JHADC, ka NPP ka jop 12 la 10 ïa ka UDP.
Hynrei ha baroh ar tylli ki District Council, ka NPP ka la ailad ha ka UDP ban ïalam ïa ka bor synshar, kata da kaba ailad ha ka UDP ban shmti ïa ka shuki CEM.
Ka jingkylli na kiba bun ba lang, ka long hato ka NPP kan hap ban pyndem biang ha ka UDP ha kaba Ïadei bad u kyrtong MP na Shillong sha ka elekshon Lok Sabha?.
Lah ban kdew hangne ba ka la don ka jingïatan tyllai kaba jur ban pynïeng ïa u kyrtong ïamon lang (common candidate) na Shillong Parliamentary Seat ha kane ka elekshon Lok Sabha kaban wan. Ka UDP ka la nang ïaid shakhmat, ha kaba ka la pynbna ïa ka kyrteng jong u Dr. Jemino Mawthoh kum u kyrtong. Na ka liang ka NPP, bunsien ka la ju ong ba ïa u kyrtong ym pat lah ban ïarai. Nalorkata u President jong ka NPP, u Conrad Sangma, uba long ruh u Myntri Rangbah ka jylla, u la ïai ban ba ka Seng jong u, kan pynïeng kyrtong ha baroh ki jaka jong ka thaiñ shatei lammihngui ka ri India,khnang ban pynkhlaiñ ïa ka Seng.
Hynrei kane ka elekshon MDC kaba dang shu dep, ka pyni ba ka NPP kan hap ban pynkylla ïa kane ka jngmut jong ka, namar ba ka UDP mynta ka la ïoh lehmon, khamtam lei lei hadien ka jingleit tyrwa ïatreilang ka Seng Congress ban thaw ïa ka EC ha KHADC bad JHADC. Wat lada na ka liang ka UDP, ka la kyntait ïa kane ka jingtyrwa ka Congress, hynrei ka la ïoh lad pat ban shim kabu, kat haduh ba ka NPP kaba jop 19 ngut ki MDC ha baroh ar ki District Council ka la aiti hun mynsiem sha ka UDP ïa ka shuki CEM, wat lada ka (UDP) ka jop tang 16 ngut ki MDC.
“Ka paw i kumba ka NPP, ka sheptieng ïoh ba ka UDP ka ïakhlad lok noh bad ban leit ïatreilang bad ka Congress”, la ong uwei u nongpeit pyrman. U la ban ruh ba ka NPP imat ka kham sheptieng bha ïiih ba ka UDP ka ïatreilang bad ka Congress wat ha ka sorkar jylla ruh. “Namarkata ka daw ka ai mon noh ïa ka UDP”, u la ong.