Press "Enter" to skip to content

Kyntait ki Sengbhalang ba ïoh bhah na ka khyrdop pisa ka NHAI

Nongpoh, Lber 04: Hadien katto katne sngi, ba la mih ka jingkynthoh kaba jur pyrshah ïa ki sengbhalang bapher bapher jong ka them Ri Bhoi District, kaba la kynthoh ba ki ju ioh ïa ka bhah lane kata ka donation na ki bor nongpynïaid jong ka khyrdop khrong khajna jong ka NHAI ha Pahammawlein, na ka liang ki nongïalam ka KSU, FKJGP bad RBYF mynta ka sngi ki la hiar sha katei ka jaka bad ruh ban pan jingshai na ki bor ba dei peit ïa kane ka khyrdop ban pynshisha halor kane ka jingkynthoh kaba mih ruh ha ki lad pathai khubor.
Katkum ka jingkynthoh kaba la mih ha kine ki sngi, la ong, ba ki bor nongpynïaid jong kane ka khyrdop khrong khajna jong ka NHAI ka la wengkam noh syndet ïa kumba 25 ngut ki samla kynthei bad shynrang, tang na ka bynta ban pynbiang ïa ka bai donation lane ka bhah sha ki sengbhalang namar ba ka kompani hi kam lah shuh wat ban siew ïa ka bainong trei jong kine ki samla.
Ha kane ka jingleit ïa kynduh ïa ki bor nongpynïaid jong kane ka khyrdop, na ka liang ka KSU, la lamkhmat da u Ferdynald Kharkamni bad u Bah Lambok Rymbai, na ka liang ka RBYF la lamkhmat da u Bah Bipul Thangkhiew katba na ka liang ka FKJGP la lamkhmat da u Bah Lui Lyngdoh bad u Bah Lumlang Mawnai, la ïa donlang ruh ha kane ka jingïakynduh da u Bah Jayand Sylliang, Rangbah Shnong ka Pahammawlein kiba la ïa kynduh ïa u Anup Bal, u ba dei u Toll Manager jong ka kompani kaba pynïaid ïa kane ka khyrdop khrong khajna.
Ha ka jingïakynduh ïa ki heh ka Eagle Infra India Ltd, kaba dei ka kompani kaba pynïaid ïa kane ka toll plaza, na ka liang u Anup Bal kum u Toll Manager, u la pynshai ba kam shem la don kum kata ka jingkynnoh bad ym don ruh ki sengbhalang kiba ju wan ban phah bhah ne donation na toll plaza naduh ba la shimti hi da ka Eagle Infra.
U la ïathuh ruh, ba ki 25 ngut ki samla kynthei bad shynrang kiba la shah wengkam na ka toll plaza ki dei ki khynnah kiba la trei shwa bad kawei pat ka kompani kaba rim kaba pynïaid ïa kane ka toll plaza bad ki la shah wengkam ruh na ki daw ki bym lah ban tip, u la pyntip ruh, ba kine ki samla ki la wan mih sha ka kompani kaba pynïaid mynta ïa ka toll plaza ha kaba ka la kular ban aikam ïa ki sha kiwei pat ki jaka namar ym lah ban thepkam shuh ha kane ka toll plaza kaba don ha Pahammawlein.
Haba ïa kren pat bad u Bah Lumlang Mawnai, kum u nongïalam ka FKJGP, haba kren halor kane ka bynta, u la pynpaw ba ki lai seng hi kata ka FKJGP, RBYF bad KSU ki la pynrem jur ïa kane ka jingkynthoh kaba khlem nongrim kaba la shu kynnoh tang ban pynthohbria ïa ka kyrteng jong ki sengbhalang ha Ri Bhoi District.
U la ong ruh, ba ki sengbhalang hi hapoh ka district ki dei kiba ju ïarap na ka por sha ka por ïa kiba bun ki khun samla ha kaban pyniohkam iohjam ha kiba bun ki kompani kiba ju wan kamai jakpoh ha kane ka district bad ruh kum ki sengbhalang ki ju don bynta ha kaban ïa khun na ka bynta ban weng ïa ki jingeh jong ki samla kiba ju mad ha ka liang ka iohkam iohjam. “Ka jingkynthoh ban shim bhah da ki sengbhalang jong ka district na ka toll plaza hi ka long ka bym don nongrim namar la pynshisha hi da ki nongpynïaid jong kane ka toll plaza, hynrei kane ka jingkynthoh hi ka dei ka jingkynthoh tang ban pynthohbria ïa ki sengbhalang, ha kaba kum ki sengbhalang hi ka pynrem jur ïa kito kiba donkti”, ong u Bah Lumlang Mawnai.
Na ka liang u Bah Jayand Sylliang, kum u Rangbah Shnong ka Pahammawlein, ha kaba kane ka toll plaza ka ieng, u la pynshai lang ba kane ka jingkynnoh shim bhah da ki sengbhalang kumba la kynthoh ka long ka bakla bad ka bym don nongrim khamtam kumba la kynnoh da kitei ki 25 ngut ki samla kiba la shah wengkam na kane ka khyrdop khrong khajna jong ka NHAI.
U la ong ruh, ba ka Dorbar Shnong Pahammawlein kaba dei ka shnong kaba la ai jaka ïa ka NHAI ban pynieng ïa ka toll plaza ha kane ka shnong ka la ioh ban thungkam ïa ki khun samla haduh 57 ngut mynta, bad ha kaba ïa dei bad ka jingshah wengkam noh jong kito ki 25 ngut hi ka dei namar ka jingkut noh ka kontrak ba la ïasoi hapdeng ka Kompani SAHAKAR bad ka NHAI, hynrei kane ka kompani kaba mynta ka dei ka kompani kaba thymmai kaba pyntreikam ïa ka toll plaza, u la bynrap.