Press "Enter" to skip to content

Rai ka Congress trei shitrhem kum ka Liang Pyrshah ha KHADC

Shillong, Lber 04: Ka Congress kaba don ha Liang Pyrshah ha Jylla, kala rai ban shongbeit noh hapoh ka Liang Pyrshah ha Khasi Hills Autonomous District Council (KHADC) bad ban shim ruh ïa ka bynta ba kongsan kum ka Liang Pyrshah ban nym ailad ïa ka Liang Synshar ban synshar kat kaba mon.
Hynrei ka Congress kaba don 10 ngut ki MDC ha KHADC, kala rai ruh ban dang pynim beit ïa ka jingtyrwa sha ka United Democratic Party (UDP) ban iatreilang ha kaban thaw ïa ka Executive Committee (EC).
Hadien ka jingïalang ba lyngkot hapdeng ki MDC ba thymmai, kaba long hynne ka sngi, u Nongïalam
ka Congress Parliamentary Party (CPP Leader) Bah Lamphrang Blah ula ïathuh ha ki lad pathai khubor ba ka Congress kan sa shong beit noh ha ka Liang Pyrshah lada kiwei ki Party ki rai ban ïathaw lang ïa ka Executive Committee (EC).
“Hynrei, ngi la rai ruh ban shim ïa ka bynta ba kongsan kum ka Liang Pyrshah hapoh ka Council” ong u Bah Lamphrang uba la jop la saw sien kynthih kum u MDC ka Mawphlang-Diengiei Constituency naduh u snem 2014.
I MDC ka Nongskhen Kong Grace Mary Kharpuri ila ong ba ka Congress kan pynlong ïa ka Liang Pyrshah kaba khlaiñ bad kaba treikam bha.
Ka Congress ka don haduh 10 ngut ki MDC hapoh ka KHADC bad ka dei ka Party ba jop bun eh hynrei kam shym la ïohlad ban thaw ïa ka Executive Committee (EC). Ka Congress ka donkam sa saw ngut ki Dkhot ban tam ïa ka jingdon paid ba mar shiteng na ka Ïingba 29 ngut ki Dkhot.
Ha kajuh ka por, ki Nongïalam ka Congress kila ong ba ka Party ka dang pynim ïa ka jingtyrwa sha ak UDP bad kiwei kiwei ki party halor ka jingdonkam ban iatreilang hapoh KHADC.
Kat kum ka jingong jong ki, ka Congress kan ap ïa ka rai halor ka jingtyrwa tad haduh ka sngi ba bam smai ki MDC ba thymmai, ka ban long ha ka 6 tarik Lber.
U MLA ka Congress na Mawsynram Bah H.M. Shangpliang ula ong ba ki Nongïalam ka Party kila ïakynduh ïa u President ka UDP Dr Donkupar Roy bad ïakren ruh bad u Dkhot ka UDP Bah Paul Lyngdoh halor ka jingdonkam ban iatreilang ha KHADC.
“Ngi la tyrwa ïa ka shuki CEM sha ka UDP bad ki ruh kila aiktien sha ngi ba ki kwah ban iatreilang bad ngi (Congress) hynrei kin hap ïakren shuwa bad ki paralok kiba iatreilang hapoh ka Sorkar MDA” ong u Bah Shangpliang.
Ha kawei pat ka liang, u Working President ka Congress bad MP ka Shillong ma Vincent H Pala u pyntip ba ka Congress kala rai ba kan nym sei kyrtong satia ban ïakhun ïa ka elekshon sha ka shuki Chief Executive Member (CEM) ha KHADC.
U ma Pala u ong ruh ba ki paidbah ka Ri-lum Khasi Jaiñtia ki khlem pat kyntait satia ïa ka Congress bad ka jingïoh vote jong ka Party ha ka elekshon MDC sha KHADC bad JHADC ruh ka khlem hiar satia.