Press "Enter" to skip to content

Thaw ki 19 ngut ki MDC da ka UDA ban synshar ha KHADC

U Bah PN Syiem kum u kyrtong Chairman
Shillong, Lber 04 : Ka People’s Democratic Alliance (PDA) ka kynhun ki MDC NPP, PDF bad Independent bad ka Regional Democratic Alliance (RDA) kaba dei ka kynhun ki MDC ka UDP bad HSPDP, ha ka jingialang kaba long ha ka sngi Balang ka la thaw ia ka United Democratic Alliance (UDA) kum ka kynhun thymmai kaban ialam ia ka bor synshar ha Khasi Hills Autonomous District Council.
Haba kren bad ki lad pathai khubor, na ka liang u Chairman ka UDA Bah Teiñwell Dkhar u ban shimti ruh kum u CEM ba thymmai u la iathuh ba ha katei ka jingialang, la jied ruh ia u Bah PN Syiem ban shimti ia ka shuki Chairman. La iathuh rh ba ka UDA ka don mynta haduh 19 ngut ki MDC, kata 10 ngut na ka PDA bad 9 ngut na ka RDA.
Shwa kane, ka la mih ka khubor ba ia ka shuki Chairman yn aiti ha u Bah Gigur Myrthong MLA bad MDC ka Mawshynrut. Hynrei haba pynshai halor katei ka bynta, na ka liang u Chairman ka PDA Bah Lambor Malngiang u la ong ba katei ka rai kam dei kaba khatduh hynrei kadei ka kam kaba la shim hadien ba ka la don ka jingiasyllok lang.
Halor ka jingkylli kaba iadei bad ka jingsam shuki Executive Member sha ki MDC, na ka liang u Bah Teinwell u la iathuh ruh ba ia mynta hi kim pat ia kren ia katei ka bynta hynrei kin sa shong biang hadien ba la dep ka jingbam smai jong ki MDC.
Hynrei katkum ki khubor ba la iohlum, ka jingsam shuki EM sha ki MDC kan long beit mar shiteng, kata khlem kynthup ia ka shuki Deputy CEM bad Deputy Chairman.