Press "Enter" to skip to content

Trei jubor ka pisa ba rem kput ka PDF : MLA Mylliem

Shillong, Lber 04 : Ka jingrem kput jong ka PDF khamtam ha Mylliem ha kane ka elekshon MDC ka dei namar ka jingjubor palat ka bor pisa, ong u MLA ka Mylliem Bah Hamlet Dohling ba dei ruh u Working President jong ka People’s Democratic Front (PDF).
Katkum ka jingong jong u, ka party ka leit sha ki paidbah da ki thong treikam hynrei kim poi pyrkhat pat ba kane ka elekshon kadei kaba remdor bha nalor kiwei pat ki elekshon.
Nalorkata, u ong ruh ba ka jingrem jong ka kyrtong ka PDF na Mylliem, Kong Teilinia Thangkhiew kadei namar ka jingjubor palat ka pisa kaba wan na shabar ban theh ha Mylliem haduh ba ka la pynkyndit ia baroh. Shuh shuh u ong ruh ba ka jingjop jong u Bah Ronnie kadei tang namar ka jingleit ban pynsngewthuh bakla ia ki paidbah halor ki skim.
Da kaba kam ba ka jingjop jong utei u MLA barim kan ym ktah ia u ha kane ka elekshon, u Bah Hamlet u ong ruh ba u don por mynta sa saw snem ei ei na ka bynta ki paidbah. Ha kawei ka liang u la ong ba ka jingrem ka party ha kane ka elekshon ka dei namar ka jingdon lang ka BJP ha ka sorkar MDA.
Kumta, u la ong ba ia katei ka mat kin sa rah hakhmat u Myntri Rangbah bad ka shong ha bor jong u ban weng ne pynneh ia ka BJP ha ka sorkar.
Ha kawei pat ka liang u MLA ka Mawkynrew, Bah Banteidor Lyngdoh u la ong ba ka jingshah rem noh ka kurim jong u, Kong Amanda Pakyntein ha kane ka elekshon MDC kadei namar ka jingiatylli lut ki seng saiñpyrthei ban pynrem ia ka PDF. Kum ban shu kdew hangne, ka kurim u MLA ka la shah rem noh ha u kyrtong ka HSPDP Bah Martle N Mukhim.
“Ka jingshah rem ka dei ruh ba ngi la pynbna slem eh ruh ia i kyrtong ban iakhun bud sa ka jingiatrei tylli ki seng saiñpyrthei kiba pyrshah ia ngi kum ka HSPDP, UDP Congress NPP kiba la trei bor bah ban pynrem ia ngi da kaba kyrshan ia u Bah Martle N Mukhim,” ong u Bah Banteidor.
Da kaba bynrap lang ia ka jingong u Bah Hamlet, utei u MLA ba dei ruh u Myntri sorkar ka jylla, u la ong ba ka party ka la dei ban ioh khambun ki MDC hynrei tang namar ka jingjur ka pisa bun ki kyrtong ki la mad noh ia ka jingshah rem.