Press "Enter" to skip to content

Haduh 903 tylli ki skul SSA ba don tang hapoh 20 ngut ki khynnah skul

2 ngut ki nonghikai ïa 5 ngut ki khynnah

Shillong, Lber 13 : Ka jylla Meghalaya ka don da ki spah tylli ki skul SSA, kaba ka jingdon ka jingdon ki khynnah skul ka long tang hapoh shi phew ngut kaba poi ruh haduh u pud ba ar ngut ki nonghikai ki hap ban hikai tang 5 ne 6 ngut ki khynnah skul la ka long ha ki Lower Primary ne Upper Primary.
Haba pynpaw ïa kane ha Iing Dorbar Thawaiñ ka Jylla, u Myntri ka tnad pule puthi ka jylla, Bah Lahkmen Rymbui u la ong ba ki don haduh 903 tylli ki skul SSA kynthup ha ki Lower Primary bad Upper Primay kiba ka jingdon jong ki khynnah skul ka long tang hapoh 20 ngut. Na kitei, 395 tylli ki dei ki Lower Primay bad 508 tylli ki dei ki Upper Primary.
Haba jubab halor ka jingkylli ba wanrah da ka MLA Congress na Mahendraganj, ka Dikkanchi D Shira ha ki kynta kylli jingkylli jong ka Dorbar Mangtyngka ha kane ka sngi Balang, u Myntri u la ong ruh ba katkum ki kyndon, ka jingdon ki khynnah kadei ban long kawei ka nonghikai na ka bynta 30 ngut (1:30).
Katkum ka jubab ba u Myntri u ai, ka East Khasi Hills ka wan ba nyngkong namar ka don haduh 165 tylli ki skul (kata 61 ki skul LP bad 104 ki UP) kiba don tang hapoh 20 ngut ka jingdon ki khynnah, bud pat sa ka West Garo Hills da ki 139 tylli bad West Khasi Hills kaba don 125 tylli ki skul.
Na ki distrik baroh, dei tang ka South West Garo Hills kaba khyndiat eh ka jingdon ki skul ba duna ka jingwan ki khynnah namar ka don tang 10 tylli ki LP bad 17 tylli ki Upper Primary.
Haba phai pat sha ka jingdon ki nonghikai ha kitei ki skul, ka jubab na u Myntri ka long ba ki don haduh 2682 ngut ki nonghikai kata 808 h ki skul LP bad 1874 ha ki skul UP. Hangne ruh ka East Khasi Hills ka dei ka distrik kaba bun eh ki nonghikai namar ka don haduh 496 ngut ki nonghikai kata 130 ha ki LP bad 366 ngut ha ki skul UP.
Halor ka jingkylli, u Myntri u ong ba ka sorkar ka dang bishar bniah kumno ban pyndonkam noh ïa kitei ki nonghikai na kitei ki skul ba duna ka jingdon ki khynnah.
U Myntri haba jubab halor ka jingkylli la ki nonghikai ki ju leit ban hikai ha kito ki skul ba don tang 2 – 3 ngut ki khynnah, u la ong ba haduh mynta kim ïoh jingtip ei ei ba ki nonghikai ki pep kaba mut ki leit beit sha skul ban hikai.
U Myntri u kular ruh ban peit halor ka jingkyrpad ban buh da ka jingtohkit la kitei ki nonghikai ki leit neem sha skul.
Halor ka jingkylli ba wanrah da u Rakkam A Sangma, u Myntri u la ong ba ïa ki skul SSA la kyrshan da ka sorkar pdeng, kumta na ka liang ka sorkar kan peit shwa la lah neem ban shim ïa kitei ki nonghikai na kitei ki skul SSA. Katkum ka jingong u Rakkam, ka sorkar ka la dei ban shim noh da kitei ki nonghikai bad rah sha ki skul sorkar kiba ka jingdon ki nonghikai ka long marwei na ka bynta 100 ngut ki khynnah.
Na ka liang u MLA ka Nongpoh, Bah Mayralborn Syiem pat u la ong la ka sorkar kan ailad neem ïa ki skul shimet kiba don bun ki khynnah skul ban ïoh ïa ki song jingïarap ba wan na ka SSA. Halor kane, u Myntri u la ong ba ka sorkar kan sa peit mynta.