Press "Enter" to skip to content

24 Ïaïong yn bishar ka SC ïa jingïakajia pud ka Meghalaya bad Assam

Shillong: Ka Supreme Court jong ka ri India, kan shim bishar ha ka 24 tarik u bnai ïaïong halor ka jingïakajia pud hapdeng ka Meghalaya bad ka Assam.
Kane ka jingbuh sngi ka ïingbishar ba hakhlieh duh jong ka ri India ban tian bishar ïa katei ka kam, ka long hadien ba ka la diang ïa ka Public Interest Litigation (PIL) ba la ujor da u Bah THS Bonet ha ka 23 tarik u Kyllalyngkot mynta ka snem.
Katkum ka jingïathuh I Dr. Fenella Lyngdoh Nonglait, Nongsaid aiñ, la ong ba ha katei ka sngi ba shim bishar, ka sorkar Meghalaya, ka sorkar Assam bad ka sorkar India kin hap ban ai jubab ne jingpynshai(affidavit). I la ïathuh ruh ba ïa kane ka PIL la ujor halor ki kot ki sla ba la ai da u Presaident ka KHNAM, u Bah Adelbert Nongrum.
Lah ban kdew
hangne ba ka sorkar Meghalaya ka la kdew 12 tylli ki jaka ba don hapdeng ka jingïaknieh bad ka Assam bad kine ki long ka Tarabari, Gizang, Hahim, Langpih, Borduar, Boklapara, Nongwah-Mawtamur, Khanapara-Pillangkata, Desh Doomreah, Block I and II, Khaduli-Psiar and Ratacherra, kaba ka jingheh ka long 2,729.14 square km.