Press "Enter" to skip to content

Ai jinghikai pyntbit treikam ka St. Edmund’s College

Shillong: Ka St. Edmund’s College, Shillong ha ka jingïatreilang bad ka Biotech Park, Lucknow ka la pynlong ïa ka prokram ai jinghikai halor ka phang “Skill to Entrepreneurship – the Next level”.
Kane ka prokram ka la sdang ha ka 12 tarik bad kan kut ha ka 15 tarik u Lber, 2019. Ka jingthmu kane ka prokram ka long ban kdew lynti ïa ki samla ha kiwei pat ki liang kiba ïadei bad ki jinghikai ha kaba kin lah ban long ki nongai kam ai jam ym ki nongwad kam wad jam.
U Kongsan ha ka sngi plie u la long u Dr. Abhijit Sharma, u Director, Indian Institute of Entrepreneurship, Guwahati. Ha ka jingkren jong u, u la ong, “Ka jingsdang jong kano kano ka jingpyrkhat thymmai ka long kaba eh, hynrei lada ïaid lyngba ki jingeh kan pynmih bad wanrah ka jingkylla ha ka imlang ka sahlang. U nongsdang barabor u dei uba kloi ban mad ïa ki jingeh.” U la kdew ruh, “Ka jingsdang ïa kano kano ka kam thymmai ka la kham suk mynta ban ïa ki por kiba mynshwa namar ka jingïaid stet ka teknoloji, ka jingkhlaiñ ka bor Sorkar bad ka jingplie ïa ki khappud jong ka Ri. U la ong ruh, Uno uno uba sdang ka kam thymmai u sngew sarong namar u sdang ïa kaei kaei kaba dei ka jong u hi shimet”.
U Padma Shri Prof. Pramod Tandon, uba long u Symbud Kongsan bad u CEO, ka Biotech Park, Lucknow ha ka jingkren jong u, u la kdew shai ba ka Thaiñ Shatei Lam Mihngi ka dei ka Thaiñ kaba riewspah ha ki spah mariang. U ong, “Kane ka Jylla ka don shibun ki kynbai dawai bad ka dei ka bynta jong kiba pule saïan ban pynkylla ïa ka rukom pyrkhat ki kpa tymmen sha ka spah bah jong ka saïan lyngba ka jingwad bniah kaba janai. U kdew ruh ba ka thaiñ ka dei kaba riewspah ha ki syntiew ki skud, ki siej bad kiwei ki jait jingthung. U ong, “Kine ki jingdon ki dei ban kylla long ki bor kiba ki samla ki lah ban long ki ai kam ai jam da kaba wad ki lynti kumno ban pynsaphriang ïa ki sha kiwei pat ki bynta ka Ri bad ka Pyrthei.”
U Dr. Sylvanus Lamare, ha ka jingkren jong u la kdew ba ka jingthmu jong ka St. Edmund’s College kam long tang ban ai jinghikai ha ki sobjek kiba ïadei bad ka syllabus jong ka NEHU hynrei bad wad ki lad ki lynti kumno ban hikai ïa ki samla pule ban shim ki sobjek ba ki lah ban sdang la ki kam la jong. U la ong, “Ka kolej ka la sdang ai jinghikai ban thung syntiew, ban shna sboh, ban thung tit, shna komputor bad kiwei ki jinghikai da ka jingthmu ban hikai ïa ki samla pule ban ïeng ha ki kjat.” U Dr. Rishi Shankar, na ka Biotech Park Lucknow u la pyni ïa ka jingtrei kam kaba lai snem ha ki bynta bapher ka Thaiñ Shatei Lam Mihngi bad ki jingmyntoi kiba ki samla pule ki la ïoh. U Br. Simon Coelho ha ka jingkren jong u, u la ïaroh ïa ka Biotech Park, Lucknow kaba la kloi ban ïatrei lang bad ka Kolej ban kyntiew ïa ka rukom pyrkhat ki samla pule. Kiba ïashim bynta ha ka prokram ki long na ki bynta bapher ka Shatei Lam Mihngi, na Shillong bad ki samla pule ka Kolej. Ïa ka prokram la bei pisa da ka Institute of Bioresources and Sustainable Development, Imphal bad ka Department of Biotechnology, ka Sorkar India.Ha kane ka sngi la don ruh ka jingïasoi soskular hapdeng ka St. Edmund’s College bad ka Biotech Park, Lucknow ban ïatrei lang bad ban ïamir jingmut na ka bynta ban kyntiew ïa ka pyrkhat ka pyrdaiñ ki samla pule. La pynïaid ïa ka prokram da i Prof. B. Manners bad ïa ki kyntien ai khublei la ai da u Dr. G. Paul.