Press "Enter" to skip to content

Don haduh jan 6000 ki kam ba lait ha ki 48 tylli ki tnad treikam ka jylla

Shillong: Hapdeng ka jingkyrduh kam kyrduh jam kaba jur ha kine ki sngi, la ïoh jingtip ba ki don haduh 5,894 ki kam sorkar kiba lait ha 48 tylli ki tnad treikam jong ka sorkar jylla.
Ïa kane la ïathuh da u Myntri Rangbah ka jylla, u Conrad Sangma hapoh ïingdorbar ha ka sngi palei haba jubab ïa ka jingkylli ba la wanrah da u bah George B. Lyngdoh, MLA ka Umroi.
U MLA ka Congress na Umroi u la wanrah ïa kane ka jingkylli da kaba pan jingtip ba ki don haduh katno tylli ki kam kiba lait ha ki tnad treikam bapher bapher jong ka sorkar jylla, nangta kiwei kiwei de ki bor treikam kiba hap hapoh ka jingpeit ka sorkar jylla.
Haba u Bah George, u la kdew ba ki don haduh 1894 tylli ki kam kiba dei ban thung da ka Meghalaya Public Service Commission (MPSC) bad wad jingtip ruh kiei ki lad ki lynti kan shim, khnang ba ka jingthung ïa kine ki kam kan sted bad ban nym ktah ïa ka jingtreikam ka sorkar, u Conrad, u la ong ba ym dei tang ka MPSC kaba dei ban thung ïa kine ki kam, hynrei ki don kiwei ruh ki bor kum ka District Selection Committee (DSC) kiban hap thung ïa kine ki kam.
“Ka jingthung ïa kine ki kam kan shim por, namar ba ki don ki kyndon bad ki rukom treikam ba hap ban bud”, la ong u Conrad. Hynrei u la ong ba ka sorkar na ka por sha ka por ka la ju bthah ïa ka MPSC ban pynsted ïa ka jingthungkam bad ka Commission ka la ju leh da kaba pynlong ïa ki eksam na ka por sha ka por.