Press "Enter" to skip to content

Kaei ka daw ba kyntait ki kmie ki kpa ïa ki skul sorkar ne SSA?

Ki paidbah ka jylla kumba long mynta i kumba kim da phai khmat shuh sha ki skul sorkar khamtam eh ïa ki skul jong ka Sarva Shiksha Abhiyan halor ki daw kiba bun ba kum ki kmie ki kpa ki kham tip bha. Kumba long mynta hi, bun ki skul sorkar kiba don ha kylleng ki bynta jong ka jylla Meghalaya kim da lah than ban khring ïa ki khynnah skul na ka daw ba bun na ki, ki la phai khmat beit sha ki skul shimet ne ki skul ba pynïaid da ki Balang bapher bapher. Lada kren ïa ka jingshisha hi, ki skul ba pynïaid ki riew shimet ne ki Balang ki kham pyrkhing ha kaba ïadei bad ki khynnah skul bad khamtam eh ïa ka leit ka wan jong ki nonghikai khnang ba kin ym ïoh ban pep ha la ka mon kumba long ha kiwei kiwei pat ki skul. Dei na kane ka daw ba ka jingdon ki khynnah ha ki skul shimet bad ki skul ba pynïaid da ka Balang ka la ïapher da ki phew shah.
Dang ha kine ki khyndiat sngi, wat u Myntri ka tnad Pule Puthi, Bah Lahkmen Rymbui u la ïathuh ha Iing Dorbar Thawaiñ ka Jylla ba ki don haduh kumba 903 tylli ki skul SSA kynthup ïa ki skul Lower Primary bad Upper Primary kiba ka jingdon ki khynnah ka long tang hapoh 20 ngut, kaba mut tang 3 haduh 4 ngut eh ki khynnah ha ka shi klas. Ym tang katta, u Myntri u la ïathuh ba ka jingdon ki nonghikai bad ki khynnah kam ïahap shuh katkum ki kyndon ba la buh. Katkum ka jingong jong u, ki nonghikai ki dei ban long marwei na ka bynta 30 ngut ki khynnah ngut hynrei na kaei kaba ki lap ha ki skul SSA ka long pynban ba ka jingdon ki nonghikai bad ki khynnah ka jan mar kumjuh.
Na kaei kaba u Myntri u pynpaw ha Iing Dorbar, ka la shai lypa ba ki kmie ki kpa kim mon ban phah skul ïa ki khun ha kitei ki skul SSA. Lada dei ba ki mon, lehse ka jingdon ki skul ba don duna ki khynnah kan don tang ha ki 10 haduh 15 tylli ki skul ym ba kan poi jan haduh 903 tylli, kata ruh khlem pat da ïa kren ïa ki skul sorkar. Ka jingkylli ka mih ruh, kaei ka daw kaba ki kmie ki kpa ki kyntait ban phah ïa ki khun ha kum kitei ki skul kiba ka sorkar ka theh da ki phew hajar ban siew tulop ïa ki nonghikai. Hato ka lah ban dei ba kam biang ka rukom hikai, lane ba kam tikna ka jingwan ki nonghikai ne kaei pat ka daw?
Ym tang katta, ka result klas 10 kaba ju tip paidbah kum ka result Matrik ka ju kdew shai ba ki khynnah kiba wan ha ki top ten jan baroh ki dei na ki skul bym dei pura da ka sorkar. Shaei jah ki skul sorkar? Balei ki khynnah na ki skul jong ki, kham bunsien kim ju paw. Haba phai ha ka por rung skul, jan baroh ki skul shimet (khamtam eh ha ki skul niam) la ka long ha ki skul ha nongkyndong ne ha sor ruh ki paidbah ki ïa tur ban ïoh pynrung ïa ki khun jong ki. Hynrei kham ñiar pat ban ïohi ba ha ki skul sorkar khamtam eh ha ki jaka nongkyndong ba kan don haduh katta katta kumba long ha ki skul bym dei sorkar.
Ka jingphai khmat jong ki kmie ki kpa sha ki skul bym dei sorkar kadei ruh namar ha kum kitei ki skul ki nonghikai ki da pyrkhing naduh ka riam ka beit, ka jingleh khuid, tista badwat ban buddien ïa ka rukom pyndep ïa ki lynnong kot la ka long ha kamra skul lane ïa ki kam ba ki phah ban pyndep ha ïing.
Kumba ka paw hi, ki kmie ki kpa kim da salia than eh ban siew ïa ka bai skul kaba rem lada ka jinghikai kaba ki khun ki ïoh kadei kaba paka tam. Hynrei lada phai pat sha kawei ka liang isynei pat ïa ki nonghikai ha kum kitei ki skul ba ki hap ban peit bad pynshitom ïalade ban peit ïa ki phew phew ngut ki khynnah ha ka jingsiew kaba jan ïapher da saw haduh san shah na ka jingsiew ba ki nonghikai sorkar ki ïoh.
Imat lada ka long kumne, ka sorkar ka la dei ka por ba kan hap ruh ban bthah ïa ki nonghikai ha ki skul sorkar ha kylleng ki bynta jong ka jylla, ba ka jinghikai kadei ban long beit mar ïa ryngkat bad ki skul bym dei sorkar, kata la ka long ha ki liang baroh. Lym kumta ka long lehnohei ban siew kai da ki phew hajar sha kum kito ki nonghikai kiba ka jingshakri jong ki ka long beit tang na ka bynta khyndiat ngut.Ym tang katta, la i donkam ruh ïa ka tnad pule puthi ba kadei ban phah wad bniah ban lap ïa ka daw ba bun ki skul sorkar ha ki jaka nongkyndong ki duna bha ki khynnah skul kiba wan rung skul kiba khlem ïahap shuh shaei shaei ruh lada nujor bad kiwei ki skul kiba ki kmie ki kpa ki hap ban ieng lain wat ban shim form ban ïoh rung skul.
Lah ban ong, ba ki skul shimet ne ki nonghikai ha ki skul niam kham ñiar ban ïohsngew ba kin pynlong ïa kino kino ki jingïakhih ban dawa tulop watla ka jingïoh jong ki kadei kaba la rit lpa, hynrei bapli ki duriap bad minot thop ha ka kam ba la aiti ïa ki na ka bynta ka bit ka biang jong ki khynnah.Ki nonghikai ha kum kitei ki skul ki buh hakhmat eh ïa ka kamram ban pyndep khlem da pynsngew ïa ki jingsiew kaba rit hynrei kata kam long ha ki skul sorkar, kiba bunsien wat ka jingleit sha skul ruh kam tikna khlem da ïa kren eh ïa ka rukom hikai lei lei. Hynrei sangsot ki bapli, haba poi pat ki prokram rakhe burom kyrpang ïa ki nonghikai ba la ju pynlong da ka sorkar man ka snem, la shu kyntait beit ïa ki bad ym ju bna ba kin ïoh rung ha ka thup jong kito ki nonghikai ban shah pynkupburom ha kum katei ka sngi.
Ka por ka la dei ïa ka sorkar ban peit ba ka jingithuh ïa ki nonghikai nangne shakhmat kan dei ym tang na ki skul sorkar hynrei wat ïa ki skul shimet, ki skul nongkyndong bad ki skul jong ki riewshimet kiba noh synñiang ban kyntiew ïa ka imlang sahlang bad ka shnong ka thaw.