Press "Enter" to skip to content

Pynphai ki shipai ïa ki masi ba la set ar bnai hadien ba tuklar ka FKJGP

Shillong, Lber, 14: Ki shipai ka Rangmen, Ri-Bhoi District hynne ka sngi palei ki la pynphai noh ïa ki masi sha ki trai hadien ar bnai hadien ba la set slung ïa ki. La pynphai biang ïa ki masi sha ki trai lyngba ka jingtuklar jong ka Federation of Khasi Jaiñtia and Garo People’s (FKJGP), Mawlai Circle.
Ki dkhot ka seng hadien ba la ïoh ujor na u Rangbah Shnong ka shnong Umphrew, mar mar ki la sha katei ka ktem sah jong ki shipai kaba don ha Rangmen ban phah pyllait noh ïa kine ki masi ba la set slung la ar bnai kynthih.
“Hadien ba ngi la ïoh jingtip na u Rangbah Shnong jong ka shnong Umphrew halor ka jingshah bat ki masi jong ki nongshong shnong ka shnong Umphrew ha ki Shipai Rangmen, mynta ka sngi ngi la hiar tohkit bad dawa ïa ki bor shipai ban pynphai biang ïa ki masi,” ong u President ka FKJGP, Mawlai Circle u Khrawkupar Nongsiej.
U la ïathuh, ba ha ka jingleit shimti ïa kitei ki masi na ka jaka set, la lap ba ki don da ki Mali kiba ap bad sumar ïa kine ki masi Kine ki mali ki ïathuh ba la kem ïa kine ki masi tang namarba ki la wan bam ïa ki syntiew kiba don hapoh ka jaka sah jong ki shipai.
Katkum ka jingïathuh jong ki nongshong shnong, ki shipai ki ju dawa da ka kuna kaba T.1000 ne T.1500 na ka bynta kawei ka masi.
“Ngi la ïakren bad kine ba bat ïa ki masi ba kin pyllait noh ïa ki masi jong ki nongshong shnong namarba ki nongri masi ki dei ki nongrep bad kim lah ban siew ïa ka dor ba la daiñ kuna,” ong une u nongïalam ka FKJGP.
Shwa ban ïoh shimti biang ïa kine ki masi, ki Mali ki la bthah ïa ki dkhot ka Seng ban leit ïakynduh ïa u Station Commander jong ki shipai bad hadien ka jingïakren, une u heh shipai u la phah pynphai noh ïa kine ki masi ba la kem.
Une u nongïalam ka seng ula kyntu ïa ki paidbah ka shnong Umphrew ba kim dei ban shu pyllait lan ïa ki masi hynrei ki dei ban da teh bad ban buh da u nongsharai khnang ban lait na kum kine ki jingjia nangne shakhmat.
U Bah Marbud Dkhar, u President barim ka FKJGP, Mawlai Circle uba la synran lang ha kane ka sngi, u la ïathuh ba ki dkhot ka seng ki la hap ban ïa pyni nia shwa bad une u heh shipai shwa ba un phah pynphai noh ïa ki masi ba la set slung la ar bnai kynthih.
“Ngi la kren hakhmat une u Station Commander ba ki shipai kim dei ban shu leh kumne da kaba pynwit ïa ki trai shnong namarba kane ka dei ka jakpoh jong ki nalor ba ki sah ruh ha ki jaka ba kham kyndong bad ki shem jyngeh shibun hiba jia kum kine kiei kiei,” u la ong.