Press "Enter" to skip to content

Pyrshah ka KSU ba khrong pisa ki Toll Gate ka NHAI na ki trai shnong

Khliehriat, Lber, 14: Ki nongïalam jong ka Khasi Students Union (KSU) Jaiñtia Hills Unit, mynta ka sngi palei ki la leit ïakynduh ïa u Addl.Deputy Commissioner ka East Jaiñtia Hills District, u Bah SS Syiemlieh ban ujor pyrshah ïa ki Toll Gate kiba don ha Lumshnong, East Jaiñtia Hills bad ha Hynniew Mer, West Jaiñtia Hills, da kaba kynnoh ba ki trai shnong ba ïaid lyngba ka khyrdop siew khajna ki hap ban siew pisa.
Ka Seng hapoh ka jingïalam jong u President, u Bah Ohibait Dkhar bad u President ka KSU Narpuh u Bah K.Suchiang, ki la kynnoh ba kitei ki Toll Gate ha rilum Jaiñtia ki ju khrong pisa khlem sngewthuh sngewthaw bad khlem jingmap ïa ki kali kamai bad ki kali jong ki riewshimet khamtam kiba na kiba dei na kitei ki thain.
“Ka seng kan ym ailad da leilei ban khrong khajna na ki kali kiba dei trai na kitei ki thaiñ ba don ki Toll Gate, ka jingbym treh ban siew khajna kam dei ba ngim don pisa hynrei ka pynpaw ba ngim dei ki mraw ha ka ri la jong ban shu siew khajna sha u mynder,” ong ka Seng ha u kyrwoh ba la phah da u Publicity Secretary KSU-JHU u Bah L.Syngkrem.
“Kaei kaba jia ha Assam, baroh ki Toll Gate ba ladep pynieng kim ïohlad ban khrong khajna namar u paidbah u pyrshah, lada ngi hap ban siew khajna kata ka mut ngim donkam ban jied nongmihkhmat shuh (MP,MLA,MDC) namar ha ka por Election dei ma ki kiba pyrta ban wanrah ïa ka roi ka par, ki surok, ki lynti ki syngkien, kumta ka dei ka kamram jong ki hi ban shimkhia ban pynbha ïa ki surok lynti syngkien,” la bynrap u kyrwoh na ka seng.
Ka Seng ka ïathuh ba kan sa leit ïakynduh ruh ïa u Project Director jong ka National Highway Authority of India, PIU Shillong ban dawa ba dei ban pynsangeh noh shisyndon ïa ka jingkhrong khajna na ki kali kiba trai na kitei ki thaiñ.
Ka KSU ka la kam ruh ba ki paidbah ki ju ud bad ki ju khñium ïa ka jingdheng kali kaba jur bha ha kitei ki ar tylli ki Toll Gate. “Wat ki kali kit nongpang ruh la tikna ba kin sahkut beit ha kane ka jingpyndheng kali ki Toll Gate,” ong u kyrwoh.
Ka seng ka la pynpaw ruh ïa ka jingsngewnguh bad ai khublei ïa ki bor synshar ka East Jaiñtia Hills District kiba la kular ban phah da jingthoh sha ka ophis jong ka NHAI sha Shillong.