Press "Enter" to skip to content

Pyrshah ka KSU ïa ka Star Cement ban khlong mawshun na Lumshnong

Shilong, Lber, 14: Ka Khasi Students’ Union, (KSU) Narpuh Circle ka la ïeng pyrshah ïa ka jingthmu jong ka M/s Star Cement ban khot ïa ka jingpynsngew paidbah (Public Hearing) ban ïoh ban khlong ïa u mawshun na ka 9 lak ton sha ka 25 lak ton ha ka shisnem.
Kane ka jaka ba thmu tih mawshun ka dei kaba ïar haduh 70 hektar kaba don ha Lumshnong, East Jaiñtia Hills.
“Ka seng ka pynpaw ïa ka jingsngewlyngngoh ba wat hapdeng ka jingpyrshah jong ka shnong, pynban katei ka kompani ka thmu beit ban pynlong ïa katei ka jingpynsngew paidbah (Public Hearing) ha ka 19/03/2019. Ka seng ka îeng ha ka nongrim kaba skhem ban ai jingkyrshan ïa ka jingpyrshah ka shnong Lumshnong ïa katei ka jingthmu katei ka kompani ban thom da ka bor,” ong u General Secretary ka KSU Narpuh Circle u Samla Deibormi Dkhar ha u kyrwoh.
“Ki daw ba kongsan ba ka seng ka pyrshah ki long ba la pynbna (Notification) ha ki kot khubor khlem ka jingbit ka shnong. Ka kompani ka la ïaid lait ïa ki kyndon ba ïateh soskular (Agreement) bad ka shnong. Ha ka jingshisha katei ka kompani ka dei ban burom ïa ki jingïateh kular naduh mynnyngkong. Ka jingïateh soskular ka long ba ka M/s Star Cement kam bit ban pynheh ïa ka jingkhlong mawshun ne kino kino ki jingthmu ban seng thymmai ïa ka kam hapoh shnong Lumshnong khlem ka jingbit ne ïa sngewthuh jingmut arliang mamla,” ong ka KSU haba pynpaw ïa ka daw tynrai ban pyrshah ïa ka Star Cement.
“Ka seng ka pynpaw ruh ïa ka jingpyrshah ba lada katei ka kompani ka ïoh ban khlong mawshun na katei ka jaka, ka don ka jingktah ba jur ïa ka rep ka riang, ki jingthung jingtep sawdong sawkun, ki sim ki doh kin duh jait bad ki tyllong umbam umdih kin rngad. Lada ka kompani ka ïoh ban pyndonkam ïa katei ka jaka, kan long ka jingma bakhraw ïa ki îng briew, namar ka kompani ka pyndonkam da ki tiar pynbthei (dynamite) haba khlong maw. Ki ïng kin orpait (crack) kumba jia ka ha kine ki snem ba ladep bad ka lah ruh ban wanrah ka jingmynsaw briew,” ong shuh shuh ka Seng.
Ka seng ka îeng skhem ban pyrshah tat haduh ban da ïoh ka jingbit ne ïa kren sngewthuh jingmut bad ka shnong Lumshnong.
Ka seng ka kyntu ïa ka Meghalaya State Pollution Control Board (MSPCB) jong ka Sorkar Jylla lyngba ka ophis u Deputy Commissioner ka East Jaiñtia Hills ban pynsangeh shwa ïa kane ka kam khnang ban ka ym mih kano kano ka jingbym sngewtynnad ne ka huri hura.