Press "Enter" to skip to content

Rung ka Lawmali bad Assam Rifles sha ka phainal ka AR IFT

Shillong, Lber 14: Ka kynhun ïalehkai ka Lawmali bad ka Assam Rifles ki la rung sha ka phainal jong ka 4th Assam Rifles Invitational Football Tournament, ha ka jingïakhun ïa ki semifinal ba la long hynne ka sngi Palei, ka Lawmali ka la lah ba kan pynliem ïa ka Smit lyngba ka tie breaker (4-1) katba ka Assam Rifles ka la lah ba kan jop da kaba suk ïa ka Mawpat da 7-1.
Haba phai sha ka jingïakhun ïa ka semifinal ba nyngkong, ka dei ka sien ba nyngkong ba ka kynhun ïalehkai ka Smit ba kan duh ïa ka kabu ban rung sha ka phainal jong kane ka lympung hadien ba ka la ioh ba kan rah arsien ïa ka na lahduh ha u snem 2016 bad 2018 bad ba ka la an ba kan bat ïa ka kyrdan kaba ar ha u snem 2017.
Ka jingïakhun ka long ba haduh ba la kut ka por ba la buh ki ar kynhun ki la lah shwa ba kin ïakhaid da mar shi kol, ha kaba ka Lawali ka la tam shahmat da shi kol ha ka minit kaba ka 9 ba la thep lyngba u Will Marbaniang bad ka Smit ka la ioh ïa ka kabu ban pynphai kylla ïa kane ka shi kol ha ka minit kaba 76 lyngba u Banshan Nongdhar.
Hadien ba ym don shuh mano mano ba lah ban ïa pynkhih ïa ka jar ban ioh ïa ka ri mano napdeng kine ar ban rung sha ka phainal, la rah noh sha ka shut tie breaker, ha kaba ka Lawmali ka jop ïa kane ka jingïakhun.
Haba phai pat sha ka jingïakhun ïa ka semifinal kaba ar jong ka sngi, lah ban ong ba ka la lam noh shilliang bha namar ba ka buit bad ka por ïalehkai ba khlaiñ lam palat lim ka la noh bha sha ka kynhun ïalehkai ka Assam Rifles tad haduh ba kan da jop da 7-1.
Ka daw kaba pynlong ia ka kynhun ka Mawpat ba kan hiar bha k rukom ïalehkai ka jong ka, ka dei namar ba dang hynnin ka sngi Balang ka dang shu dep ba kan ïakhun ïa ka quaterfinal.
Ka kol ba nyngkong naka bynta ka Assam Rifles la thep ha ka minit kaba 37 lyngba u T Nang Kuki bad ïa ka kol kaba ar la thep da u H. Hoakip.
Haba la wan ban bteng ïa ka kylla miet, ka Assam Rifles ka la bteng a kan ioh ba kan thep suk ïa ki kol na man la ki kabu kiba la wan sha ka, ha kaba u Lalboi Kipjen u la ioh ba un thep ïa ka kol lyngba ka penalty ha ka minit kaba 50 bad une u juh u pleïar u la ioh ban thep ïa ka kol kaba saw ha ka minit ba 60, u Hoakip u la thep pat ïa ka kol kaba san bad ïa ki ar kol kiba sah pat la thep ïa ki da u M.Chetry ha ka minit kaba 80 bad kaba 84 ban pyntikna ïa la ka kynhun ba ka jam sha ka phainal.
Wat hapdeng ka jingshah ñion bor bah hakhmat ka Assam Rifles, ka kynhun ïalehkai ka Mawpat ka la ioh ba kan thep ïa ka shi kol ka jong ka, ba la wan lyngba u Batiplang Bamon, na ka bol ba la ïarap ban pynbuh sha u da u Pynkhlaiñbok Wahlang ha ka minit kaba 89.
Ka phainal jong kane ka jingïakhun hapdeng ka Lawmali pyrshah a ka Assam Rifles la buh ban log lashai ka sngi Saitjaiñ ha JN Stadium. Polo ïa kaba ka por yn sa pynbna pat ïa ka hadien.