Press "Enter" to skip to content

Shaduh Aizawl hiar ka KSU ban pyn- beit jingeh ba kynduh ki paid Khasi

Shillong, Lber 14 : Ka Khasi Students’ Union (KSU) ha ka sngi Hatmajai ka la hiar shaduh nongbah Aizawl, Mizoram ban kynduh ia ki nongialam ka Mizo Zirlai Pawl ban ioh pynbeit ia ki jingeh ba ki paid Khasi ba shong shnong ha Khasi Veng, Vairangte, Kolasib district, Mizoram ki ia kynduh.
Katkum ka kyrwoh na ka seng ka long ba ka seng ha u snem 2008 ka la ia pynbeit bad poi sha ka jingiasngewthuh bad ka MZP central body lem bad ka Young Mizo Association (YMA) Shillong halor ka jingshah thombor ki paid Khasi ha Vairangte hadien ba kiwei pat ki jaidbynriew ki la pynjulor ia ki bri tympew jong ki. “Ha une u snem la dawa ruh ba dei ban ai kot jaka lane kita ki Land Holding Certificates (LHC) ia baroh ki longiing Khasi ki ba sah ha Mizoram. Hadien 11 snem jong kane ka jingiapynbeit la shem ba na ka liang ka sorkar Mizoram kam shym la ai ia ki LHC sha kitei ki paid Khasi bad kane ka la pynlong ia ka KSU ba kan hiar mardor sha Mizoram ban pynbeit ia kane ka jingeh ha kaba ka seng ka sngew ba ki paid Khasi ki long kumba shong ha shynrong wat lada ki don la ki jaka ki puta namar ka sorkar Mizoram ka kheiñ nongwei sah ia ki,” ong ka kyrwoh.
La iathuh ruh ba ha katei ka jingialang ba la pynlong ha jaka treikam jong ka MZP la wanrah shibun tylli ki daw halor ka jingdon hok jong ki Khasi ha Vairangte ban ioh ia ki LHC. La ong ruh ba na ka liang u samla Donald V Thabah, General Secretary ka KSU u la iatai ba namar ba ki Khasi ki la shong shnong ha Vairangte naduh u 1936 ha shwa ban pynkha ia ka jylla Mizoram bad shwa ban ioh laitluid ka ri India kumta ki la don hok ban long ki nongshong shnong ba pura jong ka Mizoram bad ia kane lah ban pynurlong lada ka sorkar Mizoram ka ai ia ki LHC kiba dei ki sakhi longtrai ia la ka khyndew ka shyiap.
Utei u heh KSU u la ong ruh ba ki paid Khasi ha Vairangte ki don tang 70 longiing bad kam ju don kano kano ka jingwan buhai shnong na ki paid Khasi kiba sah ha Barak Valley, Assam bad Meghalaya sha ka jylla Mizoram kaba lah ban ktah ia ka jingheh paid ki Jaidbynriew Mizo. Kumta u la kyntu ia ka MZP ba kan ailad bad iarap ia kine ki paid Khasi ba kin ioh noh ia ka hok kaba ki la angnud da ki phew phew snem. Na ka liang ka MZP ruh kum shi bynta ban pynneh bad pynskhem shuh shuh ia ka jingiatehlok bad ka KSU ki la rai ba kin ym pyrshah da lei lei lada ki Khasi na Vairangte ki leit ban pan ia ki kot ki sla jaka.
Shuh shuh ka MZP ka la kular ruh ba ha kine ki sngi kan sa leit ia kynduh kyrpang ia u Myntri ba dei peit ia ka Land Revenue ka jylla Mizoram ban kyntu ia u ban ai noh mardor ia ki LHC sha baroh 70 tylli ki longiing Khasi ha Khasi Veng, Vairangte. Na ka liang ka KSU halor kane ka jingkular ka MZP ka la ai khublei kyrpang ia kine ki nongialam ka MZP kiba kloi ban iarap ia ki paid Khasi ba shem lanot ha Vairangte khamtam ia u samla Ricky Colney Lalbiakmawia u ba dei u Advisor ka MZP bad ha kajuh ka por uba bat kum u Finance Secretary ka NESO.
Kiba mihkhmat na ka KSU ki kynthup ia u samla Donald V Thabah, General Secretary, Rapborlang Nongrum -Publicity Secretary, bad kiwei kiwei. Katba ia ka MZP pat la mihkhmat da u Ricky C. Lalbiakmawia, L. Ramdinliana Renthlei President, B. Vanlaltana – Vice President, Lalnunmawia Pautu – General Secretary bad kiwei kiwei.
Hadien ba la wai kane ka jingialang ka KSU ka la hiar noh sha Khasi Veng, Vairengte kaba don ha khappud Assam bad Mizoram ha kaba la ioh ban pynthymmai ia ki nongkitkam ka KSU Vairangte Circle. La pyntian smai ia kine ki nongkitkam ba thymmai katei ka tnad treikam da u samla Donald V Thabah hapdeng ka jingsakhi jong baroh ki nongshong shong ka Khasi Veng, Vairangte.
Kane ka long katkum ka kyrwoh ba la phah da u Bah Rapborlang Nongrum, Publicity Secretary ka Seng.