Press "Enter" to skip to content

Shah kem sa lai ngut ki runar ba donkti ban lute ïa ka trok kit sying

Nongpoh, Lber, 13: Hadien ka jingtreishitom kaba khlem sangeh, na ka liang ki bor pulit ka Ri Bhoi District ha kaban thwet ïa kiwei pat kiba donkti ha kaban lute ïa kawei ka trok kit sying kaba la jia ha ka 9 tarik mynta u bnai ha ki thain Umïam, hynne ka sngi, ki bor pulit ki la ïoh ban kem pat sa ki 3 ngut kiwei pat kiba la donkti ha kane ka kam lute ïa katei ka trok.
Kine ki 3 ngut kiba la shah kem ki kynthup ïa u Dominic Nongsiej basah ha ka shnong Umtrew bad 2 ngut pat ki kynthup ïa u Davidstar Kharshiing (19) bad u Boldenson Lyngkhoi (23), na ka lïang ki bor pulit ki dang thwet pat sa ïa u wei pat u ba la donkti ha kane ka kam u ba la suba jur ba u dei u nongïalam jong kane ka kynhun nonglute kiba la lute ïa katei ka trok kit sying. Kum ban shu kynmaw, kawei ka trok kit sying kaba don ïa u number WB- 23-D-7772 kaba la mih na ki thain Bhoirymbong hadien ba ka kit kumba 116 byrni u sying bad hadien kane kane ka trok ka la shah kthong ha kawei ka kali Maruti Alto bad hamar ba poi ha ki thain Umsawkhwan kane ka trok ka la shah kah lynti ha kaba ki runar ki la teh la khum ïa u dribar bad ïa u manager bad hadien kane kine ki runar ki la kit bak ïa kane ka trok kit sying na ki thain Umïam.
Hadien ka jingujor ejehar da u trai jong u sying bad ki nongïalam ka Ri Bhoi Green Ginger Association, na ka liang ki bor pulit ki la sdang mar mar ïa ka jingtohkit bad ban thwet ïa kiba donkti, hynrei dei ha ka sngi kaba bud, ba ki saw ngut ki runar kiba donkti ha kane ka kam ki la wan pyndem ïalade hakhmat ki bor pulit ha Umïam bad ha ka jingtohkit ki la phla ruh ïa ka jingdonkti jong kiwei pat ki runar ha kane ka kam.
Katkum ka jingtip ba la ïohlum na ki bor pulit, la ïathuh, ba ha kane ka jingtohkit, ki bor pulit ki la ïoh ban kem pat sa ïa ki lai ngut kiwei pat kiba la donkti ha kane ka kam lute ïa u tei u sying, bad kumjuh ki bor pulit ki la ïoh ban kurup ruh ïa u sying ba la shah lute na ki thain Mawryngkneng bad ïa ka Alto 800 (ML 10 B 7605) kaba la pyndonkam da kitei ki nonglute.