Press "Enter" to skip to content

Shiphew lak tyngka yn shaiñ kuna ka AIFF ïa ki klob bym ïakhun ha ka super cup

Shillong, Lber 14: Ka All India Football Federation ka la pynbna ba kan shaiñ da ka kuna kaba long shiphew lak tyngka ïa kino kino ki klob ne ki kynhun ki bym poi madan naka bynta ban ïa-khun ïa ka lympung ïalehkai jong ka Super Cup.
Kane ka rai na ka AIFF ka la mih paw hadien ba ki klob ïalehkai ba ïakhun ha ka lympung jong ka I. League ki la rai ba kin nym treh satia ban ïashim bynta ha kane ka lympung kaba la buh ban sdang naduh mynta ka sngi Thohdieng ha nongbah Bhubaneshwar.
Ka daw ka jingbym treh ban ïashim bynta ki I. League klob ha kane ka lympung ka dei namar a jingbym lah shah shuh ki klob halor ka jingbym kheiñ snep ne ba ñiew beiñ ba palat pud da ki bor ba dei khmih ka AIFF.
Ban pynpaw noh shi syndon ïa kane ka jingsngew, hynne ka sngi ka kynhun ïalehkai ka Minerva Punjab FC kaba dei ba kan ïakhun pyrshah ïa ka FC Pune City, ka la rai ba kan nym ïashim bynta sha kane ka jingïakhun.
Kiei kita ki kyndon ba la pruid dak ïa baroh ki kynhun kiba dei ban ïakhun ha ka super cup, ka AIFF hakano ma kano ka por ka lah ba kan sei buji noh da kawei pat ka kynhun ba kan ïashim bynta a kane ka lympung.
Lada jia ba ka klob kam wan satia ba kan ïakhun ha ka sngi bad ka por ba la buh, yn ñiew noh shi syndon ïa ka ba ka la randien noh ïalade na kane ka lympung ïakhun.
Ka kynhun ïalehkai pyrshah kaba la wan ban poi madan kan ioh ïa ka ri jop ryngkat bad ka lai kol.
Ka klob bym wan ban ïakhun ha kane ka lympung beit beit yn khanglad noh shi syndon ïa ka ban nym ioh ban ïakhun shuh ha kino kino ki lympung ïalehkai ha ka ri.
Ka AIFF kan bteng kan aiti ruh sha ka disciplinary committee ba kan pyn shong nongrim bha ïa kiei kiei kiba la jia baroh bad ba aiti ïa la ka kaiphod kaba pura ka jong ka khnang ban lah shuh shuh ha kaban kham pynjari ïa ki kyndon ba tyngeh, khlem da klet bad ka kuna kumba la dep ban kdew lypa ïa ka haneng.