Press "Enter" to skip to content

Shisur Rai MP Ki SengTrai Ri

B.M.Lanong

Ym ju jia koit shisha, ba ki kynhun saiñ pyrthei kin shim ïa kawei ka rai ha ipor ba lyngkot, da ka jingïahun lang, khamtam ha ka kam kaba ïadei bad ka jingjied ïa u nongïakhun u ban ïa mon lang. Hynrei ka la jia-long ha ka sngi Nyngkong 11 tarik Lber (March) 2019, ba ki Seng sain pyrthei kiba ïadonlang ha ka kynhun Sorkar Meghalaya Democratic Allaince (MDA), ki la rai lang da kawei ka sur,ba ka NPP kan ïaleh MP na Tura da u nishan (symbol) la jong bad ka UDP ruh kan ïaleh na Shillong Lok Sabha Constituency da u nishan la jong.
Kadei shisha ka dak kaba pher, kaba don ka jingkyrmen bathymmai bad kaba pynpaw ïa ka jingsan ki nongïalam ba mynta ha ka jingïar mynsiem bad jingstad-jingshemphangjongki ban poi kat sha kane ka rai da kawei ka sur.
Ha katei ka jingïalang kaba la long ha ïingsah u Dr.Donkupar Roy, President ka UDP, ba la ïadon lang kiwei ki rangbah UDP ba halor, kynthup ïa u Metbah Lyngdoh MLA, u Bah Lakmen Rymbui, Kyrmen Shylla MLA, la don lang ruh u Conrad Sangma CM uba long National President NPP, Bah PrestoneTyngsong MLA kiRangbah NPP bahalor, nangta u Bah Renik LyngdohTongkhar MLA HSPDP bad kiwei ki nongïalam HSPDP ba halor, Bah Banteidor Lyngdoh MLA PDF bad ki nongïalam ba halor, u Bah S.K.Sun MLA, Bah Lambor Malngiang MLA, Bah B. Nongsiej MLA bad kiwei ki rangbah.
Ha kane ka jingïalang, ka Seng UDP ka la pynpaw ba u nongïakhun jong ka u dei u Dr Jemino Mawthoh na ka Shillong Constituency, ïa uba la pdiang da baroh, katba ka NPP kam pat pynpaw kyrteng, tangba la sngewthuh ba ka kyrteng jong ka Agatha Sangma MP barim, ka lah ban long ka nongïakhun na Tura Parliamentary Constituency. Kumba la kdew haneng, la ïa pdiang lang da kawei ka sur.
Ka Sorkar MDA ba ïalam da u Mr. Conrad Sangma kum u Chief Minister, ka dang shu dap shi snem. Ka sorkar MDA ka la pynmih ruh ïa ka kaiphot, kaba kdew ïa ki kam kiba ka la pyntrei bad ïa kiwei kiba ka dang sdang.
Ki jingkdewkti bad jingkawang ktieh jong kiwei ki seng kum ka Congress, pyrshah ïa ka sorkar MDA,ki long ki rukom ba ju long ha ki kam saiñ pyrthei, namar khlem don daw ruh, pynmih la ka pynmih daw jubor, ban pyndep ïa ki kamram kumkakyn hun na ka liangpyrshah (opposition).
Halor ka CAB
Ha kaba ïadei bad ka Citizenship Amendment Bill 2016 (CAB) ba la wanrah da ka Sorkar BJP u Modi, kaba kwah ban khot ïa ki nong India ba kin wan phai biang sha la ka jong ka ri, na Afghanistan, Bangladesh bad Pakistan, ka kynhun MDA jong ki seng trai ri ka jylla Meghalaya ki la ïeng pyrshah. Ki la leit ruh sha Gauhati ha ka 29.1.2019 ban shim bynta ha ka jingïalang ki sengtrai ri kane ka thaiñ lam mihngi (Nort East Democratic Allaince- NEDA), ha kaba kiï arailang da kawei ka sur ba ka sorkar BJP ha Delhi ka dei ban weng ïa katei ka aiñ-lor (CAB Bill), namar kan kham pynma ïa kane ka dong mihngi, lada wanrah ïa ki phew million ki nong India kiba don ha kylleng ka pyrthei.
Wat la ki seng trai ri ka jylla ki ïeng pyrshah ïa kitei ki jingthmu ka BJP, ka Congress Meghalaya ka bym shym khih kumba khih ka kynhun MDA, ka dang wad daw halor kane ka bynta.
Haba kaSorkar Pdeng BJP ka pynïaid bad synshar mynta ïa ka ri India, hato ki sorkar ha ki jylla bym don kti bad ka BJP, kum ki Congress kim leit ïakynduh ïa ki nongïalam sorkar Pdeng ha Delhi? Ki party ne ki seng ki lah ban ïapher, hynrei ka synshar khadar hapdeng ki jylla baroh bad ka Sorkar Pdeng, ka dei ban ïaid beit katkum ki riti synshar-khadar.Ïa ki Central Scheme ba phah ka sorkar BJP, baroh kisorka rjylla, BJP ne bym dei BJP ki dei ban pyntreikam. Ki sorkar Congress ha ki jylla ki ïa pyntrei thik-thik. Hato ki la ïakylla BJP noh namarba dei ban pyndep ïa ka kamram?
Ka ilekshon MP pat?
Kumno kan long ka ri India te ym pat nang ong ïa mynta, namar ki seng ïaleh baroh kim pat dep wat ban pynbna ïa ki nongïakhun jong ki. Kaba kham thikna hi ka long ba mynta ka kynti ruh, ka dur ka dar ha ri India imat, ka Delhi kan ïoh biang da ka sorkar synrop (coalition government). Ngin sa ïa peit ynda la dei ka por, khamtam ïa ka rukom kyrshan ki paidbah ha ki 31 tylli ki State bad 7 tylli ki Union Territory.
Ha Meghalaya pat, nakinebaroharkiLokSabha seat, Shillong bad Tura, haba pynshong nongrim ïa ka kynhun MDA kaba ïa synrop lang ki seng trai ri, hato dang artatien ba u kyrtong synrop lang un jop ïa kiwei ki kyrtong Congress ne BJP ne ïa kino-kino ki ban mih?
Ne tip kumno ki sngew ki nongsam tyngka bad ki nong ïabeh tyngka, namar kane ka kynhun beh tyngka te ka la pynkyllakhongpong shi sha ïa ka synshar-khadar, namar la nangjop bun da ki heh spah-duna-jabieng, ki tam pat hangne-hangtai, katba ka kynhun kiba heh-bahaiñ, bad kiba khraw kyrdan pat, bun ki bym ïa leit thep vote shuh, haduh ba ka Election Commission na Delhi, ka la sdang pyrkhat kumno yn leh na ka bynta kane ka kynhun don standard.
Lada ki riewstad-riewshemphang kim shym bynta shuh kat ha kane ka kam ba kongsan, don jingmut aïu ban ud ïa ki jingeh kiba ki paidbah ki ïatyngkhuh man la ka sngi, ba ym poi leit- poi wan shuh na ka jingkhapngïah ha ki lynti-syngkien, ba duna um, duna ding ilektrik, duna kam-duna jam, duna bad jingduna suda kat shaba phai, tangba bun bad nangbun pat ki kam sniew ha ka imlang-sahlang. Sa kumno ngin ïaleh?