Press "Enter" to skip to content

Kem ki BSF ïa ki Nongkhaii droks, kurup pisa T. 20 lak

Shillong, Lber 15: Ki shipai Border Security Force (BSF) ba pahara ha Lalghat, West Khasi Hills, kila ïoh ban kem ïa laingut ki Nong Rongdu, kaba hap hapoh ka Ranikor Police Station, ba suba jur kum ki nongkhaii droks bad na kine ki briew la ïoh ban kurup ruh ïa ka pisa T. 20 lak.
Ki shipai BSF kila ïohkem ïa kine ki laingut ha ka jingpynap shrip hadien ka jingïoh jingtip shaphang ka jingwan ïaid lynti jong ki briew ba khaii ïa u droks Ya-ba.
U droks Ya-ba ba ju khot ruh u ‘Mad Dog Drugs’ u dei u kynja drok ha ka dur jong u dawai kuli rong saw bad la shna ïa u da ka jingkhleh ïa u caffeine bad metham phetamine ba ju tip ruh kum ka crystal meth.
Kine ki laingut ki kyrteng u Smith Ch Sangma ba 22 snem, u Purno R Marak ba 24 snem bad u Amiston T Sangma. Kine baroh laingut ki dei na ka shnong Rongdu kaba hap hapoh ka Ranikor Police Station.
Kat kum ka khubor ki BSF, ïa kine ki laingut la kem hynnin ka sngi palei na kawei ka thuk thuk BajajDiscover ba niah da u Amiston T Sangma kaba don u nombor ML06-4839. Ha ka jingtalasi ïa kine ki briew la ïoh ruh ban kurup ïa ka pisa ba T. 20 lak lem bad 4 tylli ki mobile phone.
Kine ki laingut kila phla hakhmat ki BSF ba kila wan shim ïa kane ka pisa na Shillong bad ki shipai BSF ki dang pynthikna mynta ïa ki briew ba aiti ïa kane ka pisa. Ki ong, kine ki laingut kila sahmiet ha ka 13 tarik Lber ha kawei ka Hotel ha Police Bazaar.
Ki BSF kila ïathuh ruh ba ha ka jingtohkit ïa kine ki laingut, katto katne tylli ki kyrteng kila mih baki donkti ha ka jingkhaii ïa u drok Ya-ba na shiliang khappud.
Ki BSF kila pynkhlaiñ bha mynta ïa ka jingïaid pahara ha khappud ban tem ïa ki kam bymman ha khappud bad ruh ïa ka jing pyn rung pisa be-aiñ khamtam ba ka Ri kan leit sha ka elekshon MP Lok Sabha ha u bnai ban wan.
Ïa kine ki laingut ki briew la aiti noh sha ki bor jong ka Aiñ ba kin pynlong ïa ka jingtohkit kaba kham bniah.