Press "Enter" to skip to content

9 tylli ki rynsan pynkhreh ban tan um na ki thliew tih dewiong ha Ryngksan

Khliehriat Lber 16: Ka jing pynkhreh ïa ki shiphew tylli mashin tan um ha Ryngksan, East Jaiñtia Hills District ka la nang ïaid shaid shaid ha kaba ki Engineer bad ki Technician na ka Star Cement, Lumshnong ki la poi ha ka 14 tarik mynta u bnai ban pynkhreh ïa ki rynsan ha ki thliew tih dewiong bathymmai.
Hynnin ka sngi sngi thohdieng, la lah ban pynpoi pat sa ki Generator ki ban pyndonkam ha kaba tan um.
Ki bor synshar jong ka East Jaiñtia Hills District ki la pyrshang katba lah ban pynbit pynbiang ïa ki jingdonkam ha Ryngksan bad la khmihlynti ruh ba ka kam kan long kaba seisoh.
Kat haduh mynta, ïa ki mashin tan um la lah ban pynbit pynbiang haduh khyndai tylli na ka shiphew tylli ha kaba la thmu ruh ban tan um sa na ki shiphew tylli ki thliew dewiong kiba thymmai kiba don hajan ka thliew dewiong ba dang sahkut ki lanot tih dewiong kaba la jia naduh ka 13 tarik u Nohprah 2018.
Ki kynhun ai jingïarap ha Ryngksan kiba dang don kiba kynthu ka Coal India Ltd,Kirloskar bad ka KSB ki dang bteng ïa ka kam tan um bad kumjuh ruh ka kynhun ki NDRF bad ki SDRF ki dang bteng ïa ka kam ha Ryngksan ban ïohsei ïa ki lanot ba dang sahkut hapoh kane ka krem tih dewiong.