Press "Enter" to skip to content

Buh tarik ka Supreme Court ban bishar ïa ka PIL u Bah THS Boney

47 tylli ki snem jingiakajia pud ka Meghalaya-Assam
Shillong, Lber, 16: Ka Iingbishar Supreme Court ka la buh sngi ba kan sa shong bishar ha ka 26 tarik u bnai Ïaiong, mynta u snem halor ka Public Interest Ligitation ba la mudui da u Bah THS Boney, uba long ruh u nongïalam jong ka Khun Hynñiewtrep National Awakening Movement (KHNAM) halor ka jingïakajia pud hapdeng ka Jylla Meghalaya bad ka Jylla Asam mynta la jan 47 snem kynthih.
Ha ka jingïakren bad ki lad pathai khubor hynne ka sngi saitjaiñ, u Bah THS Boney u la ong, “shwa ba ngan ai mukotduma ha ka 15 tarik, u Risaw, 2018 nga la thoh shwa da ka shithi sha u Myntri ka tnat Kam Pohing ka Ri, u Rajnath Singh ban kyrpad na ka bynta ka jingpynbeit ïa u pud u sam. Namarba ngam ïoh jubab (na u Rajnath Singh) ngi la wad ïa ki kot ki sla ba ïadei khnang ban pynksan ïa ka jingai mukotduma.”
“Ka Supreme Court jong ka ri India ka la sngap ïa kane ka mukotduma ha ka 24 tarik, Rymphang, 2019 hadien ba nga la mudui ïa ka PIL ha u bnai Kyllalyngkot mynta u snem bad ha ka 14 tarik, ka Iingbishar ka la pdiang ïa ka mukotduma ha ka 14 tarik mynta u bnai,” ïathuh u Bah Boney.
Haba ïathuh ïa ka daw kaba la pynlong ïa u ban ujor PIL sha ka Iingbishar Supreme Court u la ong, “nga la ïoh ksai ban mudui da ka PIL hadien ba nga la ïohi ha ka kotkhubor Indian Express ha ka 17 tarik, Nailur, 2018 kaba thoh ba ka Supreme Court ka ong shai kdar ba ka dei ka kamram jong ka Sorkar India ban pynbeit ïa u pud u sam hapdeng ka Jylla Karnataka bad ka Jylla Andhra Pradesh ha ka mukotduma jong ka Obalupuram Mining Company bad dei kane ka rai ba la pynmih da ka Supreme Court kaba la plie lynti ïa nga ban ïaid shakhmat.”
U la ong ruh ba katkum ka Article 3 jong ka Riti Synshar ka Ri India ka thoh shai kdar ba ka dei ka kamram jong ka Iingdorbar Thawaiñ jong ka Ri kaba don ïa ka bor ban pynbeit ïa u pud u sam haba ka mih kano kano ka jingïakajia ar tylli ki jylla bad ka dei ruh ka kamram jong ka Sorkar India kaba dei hok ban pynbeit ïa kane ka kam.
“Kaba pynlong ïa nga ban ujor mukotduman ka dei namarba nga ïohsngew bad nga ïohi ïa ka jingshem lanot jong ki paidbah kiba shong basah ha khappud. Kum u Ophisar IFS ba la trei ha ka Jylla Orissa, ngam pat ju ïohsngew ne ïohi ba kin don ki jingïakajia ha ki khappud mynba nga dang don ha khappud ka Jylla Andhra Pradesh 10 snem bad ban peit ruh katto katne ïa u pud u sam ka Orissa bad ha Chatisgarh kumba san snem,” u la ong.
Shuh shuh u la bynrap, “ka jingjia ha Malang Hua ha kaba la mih ha ki lad pathai khubor halor ka jingshah pynïap jong ki samla na nongbah Guwahati ha Karbi Anglong District, ka la pynkylla phetwir pynban ïa ki briew jong ka Jylla Meghalaya ha ri lajong. Dei kane kaba la pynlong ïa nga ban rai ba ym long shuh ban shu iehnoh ïa kane ka kam bad dei ban leh eiei noh ïa kane ka prum kaba pynmih shi pynmih ksuit,” ong u Bah Boney.
Haba kynthoh ïa ka jingbym poi shaei shaei ruh ki jingïakren pynbeit pud hapdeng ka Jylla Meghalaya bad Assam u la ong, “la bun sien ngi la ïohi ïa ki jingïakren hapdeng ki Myntri Rangbah bad ki Chief Secretary ban ïoh jingsuk shipor, hynrei kim shym la poi shaei shaei ruh bad ki ishu ïapynbeit pud ki la shu kut tang ha ki jingïakren.”
U President ka KHNAM, u Bah Adelbert Nongrum, haba bynrap halor kane, u la ong, “naduh ba la thaw ïa ka Chandrachud Commission ka jingïapynbeit pud kam shym la poi shaei shaei ruh bad wat ki jingïakren hadpdeng ki Myntri Rangbah bad ka jingïasoi ïa ka Status Quo ruh kam shym la don jingmut eiei.”