Press "Enter" to skip to content

Hikai ka GNI ïa ki nongthoh khubor ba jyllei ki khubor thok ha ki Social Media

Shillong, Lber, 16: Ka Google News Initiative Training, ha ryngkat ka jingïatreilang bad ka DataLeads and Internews, hynne ka sngi saitjaiñ ka la pynlong ïa ka jingai jinghikai kaba shi sngi sha ki nongthoh khubor bad kynthup ruh ïa ki samla pule ka EFLU, Shillong bad ïa ki samla Pule Masscom ka St. Anthony’s College, Shillong kumno ban tih bniah naduh tyllong ïa ki jingpynsaphriang ïa ki dur thok bad ki khubor lamler ha ki Social Media ha kine ki sngi.
Ïa kane ka jingai jinghikai, halor ka phang “Poll Check India: Covering India’s Elections” la ai jingïatreilang ruh da ka Shillong Press bad ba la kyrshan da ka ophis u Chief Electoral Officer, ka Sorkar Meghalaya, ka tnat Information and Public Relations (IPR) ka Sorkar Jylla bad ka Bharat Sanchar Nigam Limited (BSNL).
U Monjib Mochahari, uba long u Assistant Professor ka Assam Don Bosco University bad u Jaikishan S.G uba long u Assistant Professor ka Assam Don Bosco University ki la pynsngewthuh bad ai jinghikai kaba bniah bha sha ki lad pathai khubor bad sha ki samla pule kumno ban pyndonkam ïa ka technology ha kane ka juk ba ka Social Media ka roi stet haduh katta katta.
Ka jingpynlong ïa kane ka prokram ka long shi bynta ban ïarap ïa ki nongthoh khubor ba kin dup lah ban pyndep ïa ka kam lum bad pathai khubor ha ka elekshon sha ka Ingdorbar Thawaiñ Lok Sabha ka ban sa long ha ka 11 tarik, u bnai Ïaiong, mynta u snem.
Ka jingthmu haba pynlong ïa kane ka jingai jinghikai ka long ban pynsngewthuh janai ïa ki nongthoh khubor halor ka ‘Digital Safety and Security’, ban tih bniah bad ban wad ïa ka jingshisha ïa ka tyllong jong ki dur thok ba la pynmih ha ki social media ha kylleng ka ri India.
Kumba 70 ngut eiei ki nongthoh khubor ba kynthup ruh ïa ki samla pule ki la wan ïashim bynta ha kane ka jingai jinghikai kaba la long baroh shisngi.
Naduh u snem 2016, ka Google ka la ai jinghikai palat 13,000 hajar ngut ki Nongthoh khubor ha kylleng ka ri India, ha ki 200 tylli ki Newsrooms bad ha ki 40 tylli ki sorbah.
Ïa kane ka jingai jinghikai ïa mynta la pynlong ha ki 30 tylli ki sorbah ha kylleng ka ri ha ka ktien English, Hindi, Malayalam, Bangla, Kannada, Gujarati, Odia, Tamil, Telugu bad Marathi.