Press "Enter" to skip to content

Ïakynduh EE tnad Urban ka seng WYF ban pynroi ïa ka Nongstoiñ

Nongstoiñ, Lber 16: Ka Western Youth Federation Seng Kmie H.Q. Nongstoiñ, ka la buh jingkyrpad hakhmat u Executive Engineer Urban Affair Shillong, ban thaw lad thaw lynti ban pynïoh scheme na ka bynta ban bteng biang ïa ka lynti ïaid kjat naduh Post Office Nongstoiñ haduh St. Peter’s School Pyndengrei West Khasi Hills Nongstoiñ.
Katkum ka jingkhmih ha ki ba bun balang kane ka dei kaba donkam palat, namar kadei ka lynti bah ba ju ïaid kjat ki khynnah skul, ki paidbah ruh bad ka dei ruh ka surok bah ba ïaid ki kali kaba long ka jingma ïa ki khynnah skul kiba dei ïaid lynti na kane ka surok. Dei halor kane ka daw ba ka seng ka buh jingkyrpad ban thaw lad bad khmih lem ïa kane, khnang ba kan long shngaiñ ïa ki paidbah khamtam ïa ki khynnah skul kiba leit bad wan na kane ka lynti bad ban ïada ruh na ki jingjia ba sngewsih hadien ha bud.
Ha kawei pat ka liang ka seng ka kyrpad ruh ban sngewbha ban thaw lad lang ban shna ïa ar tylli ki foot bridge kiba pynïasnoh ïa ka shnong Mawiong Pyndengrei sha ka shnong Mawiong Lumsyntiew Nongstoiñ. Kane ka footpath ka kut tang ha rud ka wah duid khlem da don ka jingkieng ban kam sha shilliang, namar kane ruh ka dei ka lynti ba ïaid briew man ka sngi ka wanrah jingeh ban kam sha shilliang khamtam ha ki por lyiur ba jur slap. Hangne ruh don ki khynnah skul kiba ïaid lynti man ka sngi kiba dei ki khynnah skul jong ka Thomas June bad ka St. Peter’s, ki shem jingeh bha ban ïaid na kane ka lynti ha ki por lyiur ba heh um.
Kumta ka seng da kawei ka jingmut kam banse ban phai khmat sha ka office jong ka Urban Affair kaba dei ka office ba peit ïa ka roi ka par ha ki jaka sor, ba kan ai jingïarap lem na ka bynta ka jingdonkam ki paidbah jong kane ka dong.