Press "Enter" to skip to content

Ka Gospel ka pyntylli ia ka jaidbdynriew Khasi !

Ka jaidbynriew Khasi- Jaintia wat la ka long ka jaidbynriew kaba rit bad kaba tang shi troh hynrei ka long pat kaba iar haba niew ha ka jingbun jong ki jait ktien kiba ngi kren. Kumba la rwai da u Nongrwai ieit ri ia ki kyntien, Khynriam-u pnar- U Bhoi- U War: ki dei u paid Khasi ba iar ka long shisha kaba eh ban shemphang lada ngim don ia kawei ka ktien kaba kyllum lang ia baroh ba ngin lah ban sngewthuh ban iakren. Ym lah ban mutdur kumno ki briew shuwa jong ka jingwan jong ki Missionary, ki lah ban iasngewthuh ban iakren: namar ba tang ha Jaintia ruh ka long kaba eh ban iasngewthuh kawei ka ktien bad kawei pat, kumjuh ruh ha Ri Bhoi, Ri War, Khasi, Maram bad Lyngngam.
Ka long shisha kaei kaei kaba sngewtynnad ban pyrkhat ia ka jingiohi jngai jong ki Missionary bad khamtam eh u Rev. Thomas Jones u ba la sei ka ka ktien Sohra ban pynlong ia ka kum ka ktien kaba iasngewthuh lang ia baroh. Dei lyngba jong une u briew u Blei u ba wanrah ban rah ia jingshai Gospel ba la lah ban pyniatylli mlon ia ka jaidbynriew Khasi da ka jingioh ban thoh bad pule da kane ka ktien. Ka jaidbynriew ka la donbok shibun eh ban ioh ia la ka jong ka ktien pdeng da ki dak thoh ba la tbeh jingshai da une u Missionary kane ka la pynsuk shisha ia ngi baroh ba ngi lah ban sngwthuh ia kawei ka ktien pdeng lang wat kat haduh u upud ba ngin lah ban ioh syndon iaka ktien thoh tien tar bad ruh haduh ka ktien pathai khubor.
Kum ka jaidbynriew ngi sngewthuh biang biang ba ngi dei ki Khasi wat la don ki khep ba ngim nang ban kren ia ka ktien Khasi ruh, ki maram ki syllad beit la la ktien maram, ki war la ka ktien war, ki bhoi la ka ktien bhoi kumjuh ruh kiwei pat namar ba kim ioh ia ka lad ban pule ia ka ktien. Hynrei ym lah ban len ba wat kine ruh ki tip ialade bad ki dei ki Khasi.Hynrei ka jingdon jong ka ktien Sohra kum ka ktien pdeng ka la weng noh ia kine ki jingeh baroh bad ka la pyniatylli syndon sbak ia ka jaidbynriew. Lyngba kane ka ktien Sohra kaba u Sahep Rev. Thomas Jones u la ai, kum ka jaidbynriew ki la lah pathai khubor ban ioh ban ialum lang bad ia wan lang lyngba kane ka ktien. La iohi ruh ba kiwei pat ki seng trai ri ruh ki la lah ban wan sha ka jingiatylli hadien jong ka jingwan jong ki dak Khasi la jong ba la lah ban iawer lang ia ki riewkmat sha ka jingialong kawei.
Khyndiat haba phai shaphang kaei ka jingthmu jong u Rev. Thomas Jones, ne kaei ka khubor kaba u Blei u don ban kren sha ki briew lyngba kane ka phang ne ka sobjek ban wanrah ia ka ktien Khasi. Sngewdei ban ong ba ka dei ka jingthmu kaba U Blei u kwah ban wanrah ia ka jingkyrkhu sha ki briew ba lyngba jong kane ka ktien yn lah ban pynphriang khambha ia ka Gospel sha ka Jaidbynriew Khasi. Ym lah ban len ba ka ktien ka jong ka jingkyrkhu U Blei bad lehse kawei ka jingthmu ba kongsan ka long ba ki briew kin nang ban wad ia U Blei jong ka Bible lyngba ka Gospel jong ka jingpynim. Kumta ka ktien Khasi kam kut tang ha kaba pyniatylli ia ka jaidbynriew hynrei ruh ban wanrah ia ka khubor jong ka jingpynim sha ka jaidbynriew.
Lehse ym baroh ngin ioh ia kane ka jingshemphang ia ka jingthmu jong U Blei lyngba ki shakri jongu kiba la wan ban rah ia ka jingshai Gospel sha kane ka ri lum Khasi Jaintia. Kat kum ka google search result: la pynkylla nyngkong eh sha ka ktien Khasi ia ka Bible ha u snem 1891 kata hadien kumba 50 snem ba ki Missionary ki al wan ban iuh kjat ha kine ki ri lum Khasi. Ka jingioh ban pule ia ka Bible kaba dei ka ktien U Blei ka la long kawei na ki mat ban khring ia ki riew hyndai sha ka jingkwah ban nang kham pynbha ia ka thoh ka pule bad ruh ban sngewthuh khambha ia ka ktien.
Ka long kaei kaei kaba sngewtynnad han puson shaphang ka jingwad Blei bad ka jingwad ia ka jingngeit. Ym lah ban len ia ka jingshisha ba ki niam bad ki kynhun niam bapher bapher naduh ki Hindu, ki Muslim bad kiwei pat ki niam ka pyrthei ki leh shibun kiei kiei ban pynshitom ialade ban wad ia U Blei. Hynrei U Blei jong ka Bible u dei u Blei uba wad ia la ki jong ki briew kiba u la thaw bad u la pynlong bad u wan ban iashem wat ia kane ka jaidbynriew Khasi jong ngi, da kaba u la wan ban ai ai kane ka ktien kaba ngi lah ban iasngewthuh lang. Kane ka pynkynmaw pat ia ka jingieit jong U Blei, ka kitab Jenesis ka iathuh ba kumno mynshuwa ki briew ki kren kawei ka ktien, hynrei hadien ka jingtmu jong ki ban leh da ka bor bad ka jinglah jong ki ban tei ia u Mot Babel ban kot shaduh bneng, U Blei u la shim noh ia ka ktien na ki bad bad baroh ka jingthmu jong ki ka la pulom lut noh. Hynrei lyngba u Thomas Jones u Blei u la plied ia lad jong ka jingiatylli ia kane ka jaidbynriew Khasi jong ngi.