Press "Enter" to skip to content

Kem ki Pulit ïa u Phadar ba jrong kti ïa ka Kynthei

Shillong, Lber 16: Ki Pulit ka Jylla hynnin ka miet sngi thohdieng, kila kem ïa uwei u Phadar uba dei u Nong Kerela, namar ka jing jrong kti ïa kawei ka Kynthei hapoh ka Bos Night Super kaba dang don ha lynti na Shillong sha Garo Hills.
Une u Phadar u kyrteng u Father Biju Joseph, ong ki Pulit kiba ïathuh ba ki passenger jong kane ka bos kila kem bad shoh ïa une u Phadar hadien ba kane ka Kynthei kala mai bad tim ïa u ha bos.
Kat kum ka khubor Pulit ka North Garo Hills, la ong ba kane ka kynthei ba shah jrong kti ka dei kaba dang 27 snem ka rta bad kaba trei hapoh ka Tnad ka koit ka khiah ka Jylla.
Ki Pulit ki ong, namar kane ka jingjia ka jia ha ki bynta jong ka Assam, ki Passenger kila ap tad haduh da poi ha Meghalaya hashuwa ba kin aiti ïa u sha ki Pulit ka Bajengdoba hynnin ka miet.
Ki Pulit ki iathuh ba une u Phadar u dei jong ka Guwahti Provincial of the Missionaries of St. Francis De Sales (MSFS) Congregation uba shakri mynta kum u Lyngdoh Niam jong ka Sumanpara, South Garo Hills District.
Kat kum ka ejahar bala mudui da ki passenger, une u Phadar u dang wan na Shillong ban leit sha Tura da ka Millennium Wave Bus. La kynnoh ba ula jrong kti ïa kane ka kynthei kaba shong mar syndah jong u da kaba pyrshang ban bat ïa ka kti jong ka. Kane ka jingjia kala jia hadien ba kane ka bos kala mih na Paikan hadien ba dep bamja ki passenger.
Ki Pulit kila register case pyrshah ïa une u Phadar bad ka jingtohkit mynta kala ïaid shakhmat