Press "Enter" to skip to content

La rakhe ïa ka ‘International Day of action for Rivers’ ha nongstoiñ

Nongstoiñ, Lber, 16: Ka seng ki nongsumar dawai khasi nylla ryngkat ka jingïasnohkti lang bad ka seng longkmie New Nongstoiñ lem bad ka seng mahajon New Nongstoiñ myn ha ka sngi palei jong ka taiew, ka la pynlong ïa ka jingïalang ai jinghikai haba ïadei bad ka jingsumar khuid ïa ki wah um.
Katei ka jingïalang ïa kaba la tip ruh kum ka ‘International day of action for rivers’ kaba la buh ruh ïa ka phang kaba ong ‘keep rivers clean’, la pynlong ha St.Xaviers Secondary School New Nongstoiñ.
Ha katei ka sngi ka seng ka la pynkup burom kyrpang ïa ki nongpynkhuid ïa ki iew ki hat kiba ju pykhuid ne sar ïa ki surok ki syngkien man la ka sngi.
Kitei kiba la ïoh ïa ka jingpynkupburom ha katei ka sngi ki kynthup ïa u bah Kendrowell Sangriang, bah Prestarwell Marngar, bah Philipshon Marbaniang, bah Wostarwell Lyngkhoi, bah Phostarwell Lyngkhoi, bah Wosligen Thongni, bah Kendro Kharbani.
Ha katei ka sngi la ïadonlang ruh u bah D.Shabong EE PHE Nongstoiñ, kong A.Kharsyntiew secretary ka seng longkmie New Nongstoiñ, bah Dmickstar Lyngdoh president ka seng mahajon New Nongstoiñ, kiwei kiwei ki ophisar na kiwei kiwei ki tnad sorkar bad la pynïaid ïa katei ka jingïalang da u bah S.Nongrem secretary seng nongsumar dawai khasi nylla West Khasi Hills.
Ha katei ka sngi u bah T.Lyngwa khliehduh ka District u la long kum u kongsan ha katei ka jingïalang. U bah lyngwa haba ai jingkren kum u kongsan u la ong, “Nga da ai ka jingïaroh ïa kine ki kynhun kiba la mih madan ban leh ïa kaei kaei kaba ki don ha ka mynsiem na ka bynta ka jingbha ha ka imlang sahlang ha kaba phim shym la kut tang ha ka jingsngew halide. Hynrei phi la pynlong ïa ngi ruh ba ngin kyndit ba ka dei ba ngin leh ïa kum kine ki kam khamtam ba phi la pynkup burom ïa ki briew kiba trei shitom na ka bynta u ba bun balang. Namar ki dei kine kiba trei shitom bad kiba don ïa ka jingkitkhlieh na ka bynta jong ngi wat haba ki trei ïa kiba kum kine ki kam bad ha kiba bun balang ki ñiew ïa kum kane ka kam kum ki kam kiba rit. Hynrei ngan ong ha phi ba baroh ki kam kiba ngi trei ki long kiba donburom khamtam kine ki nongpynkhuid iew ki long kadaw kaba khraw kiba lah ban ïada na ka jingjaboh jong ki wah namar dei kine kiba sar bad tam ïa ka jingbret pathar ïa ki ñiut sha ki wah um bad lada ym don kum ma ki, ki wah um jong ngi ki long kiba jakhlia noh. La ngi ñiew ba ki leh ïa ki kam kiba rit hynrei ki long kiba wanrah ïa ka nam kaba khraw”.
U Phadar Willbert Marweiñ Parish Priest ka Nonbah Parish haba ai jingkren ha katei ka sngi u la ong ba ka wah ka ïaid la ka lynti. “Hynrei dei u briew uba pynjakhlia ïa ka bad ka donkam ban pynkhuid ïa ka jabieng jong ngi bad lada ka jabieng jong ngi ka khuid ka khuid lang nadong shadong. Khamtam lada ngi nang ban burom uwei ïa uwei nga ngeit ba kan ymdon ka jingjynjar, hynrei kan dap tang ka jingsuk ha ka imlang sahlang. Namar kata ngi dei ban ai mynsiem ïa ki briew kiba trei ïa ki kam kumba u Jisu u ong lada ngi kwah ba kiwei kin leh ei ei ïa ngi, ngi hap ban leh shuwa ma ngi ïano re ïano ïa u ba ngi kwah ba ma u un leh na ka bynta jong ngi”.