Press "Enter" to skip to content

Maham ka Raid Kyrdem ban thang khlaw

Nongpoh, Lber 16: Ka Dorbar Raid ka Raid Madan Kyrdem ka la pynmih syndon da ka hukum kaba tyngeh ban khang pyrshah ïa ki paidbah kiba shong basah hapoh ka Raid Madan Kyrdem ba kim dei ban thang khlaw klumar bad ruh ban pynïap ïa ki dohum ki dohwah kiba don ha ki wah bad ki wahduid bapher bapher hapoh ka Raid.
Haba ïa kren bad u Sirdar ka Raid Madan Kyrdem, u Bah P. Makdoh u la ong ba kane ka jingshim rai ka Raid ban khang pyrshah ïa ki kam thangkhlaw bad ruh ka jingpynïap pathar ïa ki dohum ki dohwah, ka dei na ka daw ba bun ki riew shim kabu khlem da pyrkhat ïa ka lawei ki thang dusmon ïa ki khlaw ki btap bad ruh ban pynïap tuh ïa ki dohum ki dohwah da kaba wieh dawai bad shoh khariew.
U la ong ruh ba ka Dorbar Raid ka don kata ka thong ban pynneh pynsah ïa ki khlaw ki btap kiba don hapoh ka Raid kaba long shi bynta ban pynneh pynsah ïa ka mariang bad dei namar kane ka daw kumba kine ki bnai tyrkhong ki la sdang ka Dorbar Raid ka la maham lypa ïa ki paidbah ba kim dei ban thang ïa ki khlaw ki btap kiba don hapoh ka Raid.
“Bun ki jingjia ba sgnewsih ha kine ki bnai tyrkhong bad heh lyer ki jia ba ka ding ka bam duh ïa ki ing ki sem bad kawei na ka daw ka dei ka jingthang klumar ïa ki khlaw ki btap” u la ong bad bynrap ruh kumta ka Dorbar Raid ka maham jur ban thang khlaw bad lada lap ïa kino kino kiba ïaleh pyrshah kin hap ha ka jingpynshitom katkum ki kyndon ain jong ka Raid bad ban siew ruh ïa ka kuna kaba T. 10000 ban tehlakam na kitei ki kam thang khlaw.
Ha kawei ka bynta ruh u la ong ba ka Dorbar Raid ka maham ruh naduh ka jingpynïap pathar ïa ki dohum ki dohwah bad kumjuh ruh ki mrad khlaw, dei namar ba ka Dorbar Raid ka angnud ban pynneh pynsah ïa ki kynja mrad kiba don hapoh ka Raid, ha kaba da ka jingsiat ban pynïap pathar ki riew shim kabu bun ki mrad kiba julap ha ki khlaw ka Raid ki la sdang ban duh jaid.
Namarkata, ka Dorbar Raid ka khot bad wer ïa ki paidbah ka Raid ba kin dei ban ai ka jingïatrei lang bad ka Dorbar Raid bad ruh ban don kata ka jingkitkhlieh ïa la ka Raid khnang ba kiei kiei ki thong ba la buh da ka Raid na ka bynta ka jingmyntoi ki paidbah kan sa long kaba jop, u la bynrap.