Press "Enter" to skip to content

Rakhe ka West Khasi Hills ïa ka sngi ki nongthied nongpet

Nongstoiñ, Lber, 16: Ka Ophis u Deputy Commissioner West Khasi Hills District mynta ka sngi ka la rakhe ïa ka sngi ba kyrpang halor ka hok ki nongthied nongpet bad ka phang pdeng jong katei ka jing rakhe ka long “Trusted Smarta Product”.
Ha katei ka jingrakhe la ïa don ryngkat da u Bah T.Lyngwa Deputy Commissioner kum u kongsan, Bah S.Warjri EAC bad u Bah R Syiem Food Safety Officer kum u resource person. La wan ban ïashimbynta da ki rangbah shnong, ki Fair Price Shop Dealers, ki ophisar jong ki tnad trei kam bapher bapher jong ka sorkar bad kiwei kiwei.
U Bah Lyngwa haba pynshai ha katei ka sngi u la ong ba ki paitbah nongthied nongpet ki don ka hok ban ujor sha ka District Consumer Right Forum (DCRF) lada kino kino ki nongdie ki die palat ïa ka dor ba la buh. Nalor kata u la pynshai ba ïa ka mar kaba hapoh arphew lak tyngka ki nongthied ki lah ban ujor sha ka State Consumer Right Forum (SCRF). Namarkata ki paitbah ki la dei ban sngewthuh halor ka hok jong ki kum ki nongthied nongpet.
U Bah S.Warjri haba pynshai ha katei ka sngi u la ong ba ki don shibun ki kyndon aiñ ki ban ïada ïa ki nongthied nong pet na ka jingshim kabu jong ki nongdie bad kitei ki kyndon ki long kum ka Consumer protection Act 1986 Sales of goods Act 1990 bad kiwei kiwei ki kyndon aiñ kiba kdew ïa ki jait jingpynshitom ïa ki nongdie jing die lada ki pynkheiñ.
Khatduh eh la ïoh ïa ka jingkren na u Bah R.Syiem FSO ha kaba u la pynshai ba ki paitbah ki dei ban da bishar bniah haba ki thied ïa ki mar ki mata, kum ki mar bam bad ki dei ruh ban da peit bnïah ïa ka rukom thew bad ka jinglong jong ki mar bam la ka long, ha ka jingbun jing khyndiat ne ha ka jingbha jong ki mar bam khnang ba kan long ka jingmyntoi na ka bynta ki nongthied.
Ha katei ka sngi la wan ban ïashim bynta lang ruh da ki khynnah jong ki skul bapher bapher kiba don hapoh ka sor Nongstoiñ.