Press "Enter" to skip to content

Yn mihkhmat 13 ngut kiba duna dkhot met sha ka National Coaching Camp

Nongpoh, Lber 16: Ka long ka jingkmen bad ka jingkyrkhu kaba khraw ïaki khynnah skul ka Lynti Jam Special School and Vocational Training Center kaba dei ka skul kaba ai jinghikai kyrpang ïaki khynnah ba duna haki dkhot met, hadien ba ki khynnah ym tang ba ki pynlut por haka kot ban shah hikai hynrei ki ïohlad ruh ban mih shabar ban sei ïaka sap kaba ki don haka liang ka kam sports, ha kaba 13 ngut ki khynnah kiba duna haki dkhot met na katei ka skul kin mih ban leit mih khmat ïaka jylla sha ka National Coaching Camp naduh ka 18 haduh 23 tarik ha nongbah Guwahati.
Ïa katei ka National Coacing Camp bala pynïaid da ka Special Olympic Bharat yn pynlong ha Sarusajai Sports Complex ha Nongbah Guwahati ha kaba kitei ki khynnah kin ïoh ban shim bynta bad shah hikai pyntbit haki jingïalehkai athletic bapher bapher.
Haba kren sha ki nongthoh khubor u Bah Sumarlang Swer President katei ka skul kaba hikai kyrpang ïaki khynnah ba duna haki dkhot met kaba don haka shnong Mawtnum, u la pynpaw ka jingsngewkmen ba ka Special Olympic Bharat kala jied ïaki khynnah katei ka skul halor ka jingtbit bad ka sap kaba ki don haka kam ïalehkai sports watla kitei ki khynnah ki dei kiba kyrpang ym kum kiwei ki khynnah.
U la ong ruh ha kawei ka liang kitei ki khynnah kim ju ïohlad ban mih shabar bad ban lehkai kino kino ki jait sports namar ba kidei kiba duna haki skhot met bad bun sien kidei kiba shah kyntait ha iing ha sem bad kumjuh haka im lang ka sahlang namar ba ki duna haki dkhot met, hynrei lyngba kum katei ka jait prokram ka long pat ka jingai mynsiem ïaki khynnah ba ki ruh ki ïoh bynta kumba ïoh kiwei pat ki para khynnah naduh ka pule ka puthi bad ka kam ïalehkai sports.
Kitei ki 13 ngut ki khynnah ki kynthup ïa u Melambha Warjri, Titus Syiem, Donborlang Maring, Robert Makri, Franky Lyngdoh, Mishal Makri, Paiabaskhem Suting bad u Sisarus Pamshong kiba dei ki shynrang bad 5 ngut ki kynthei ki kynthup ïaka Rimanbha Kshiar, Nongrimbakshem Makri, Daphinia Japang, Jicica Shisha Warjri bad ka Ebakordor Syiem.
Shuh shuh la jied ruh 3 ngut ki nonghikai kiba ban shah hikai ha katei ka Coaching Camp ba kynthup ïaka Banrilang Syiemlieh, Fellysha Tynsen bad u James Lyngdoh ha kaba kitei ki nonghikai kin lah pat ban hikai ïakiwei ki khynnah hadien ba kila wanphai na katei ka jaka hikai.