Press "Enter" to skip to content

Ar snem pynkhreh u Bah THS Boney ban ïakhun ïa ka elekshon MP sha Lok Sabha

Shillong, Lber, 17: U Bah THS Boney, u kyrtong MP jong ka Khun Hynñiewtrep National Awakening Movement (KHNAM) u la ïathuh ba u la pynkhreh ïa ka jingïaid lynti kaba ar snem kynthih hadien ba u la rung sha ka jylli jong ka saiñpyrthei na ka bynta ban aireng ïa ka elekshon MP sha ka Iingdorbar Thawaiñ Lok Sabha na Shillong Parliamentary Constituency ka ban sa long ha ka 11 tarik, u bnai Ïaiong mynta u snem.
Kumba ka long mynta, ki kyrtong ba la mih shakhmat ban ïakhun ïa ka Elekshon MP na Shillong Parliamentary Constituency ki long u Bah THS Boney, u kyrtong ka KHNAM, u Dr. Jemino Mawthoh u kyrtong monlang jong ka Kynhun MDA ba la pynieng da ka UDP, u Samla Samuel Hashah u kyrtong Independent bad u Ma Vincent H. Pala u kyrtong ka Indian National Congres, uba long u Sitting MP la ar samoi kynthih.
Haba kylli, hato u ïohi neem ba ka long kaba jwat ïa u ban aireng ha kane ka elekshon namarba ka kynhun MDA bad ka Congress ki don ïa ki kyrtong kiba kham snar bad kiba la ithuh lut da ki paidbah, u Bah Boney, uba long u General Secretary ka KHNAM ha ka jingïakren bad ki lad pathai khubor ha ka sngi saitjaiñ u la ong, “ka jingpynkhreh jong nga ïa kane ka elekshon ka dei da ka jingleit tur sha ki shnong nongkyndong ka East bad West Khasi Hills District, Ribhoi District bad ïa ka East bad West Jaiñtia Hills District khnang ban sngewthuh haduh katno ki paidbah ki mad ïa ka jingsyrtok na ka jingbym treikam hok ki skhim pynroi na ka Sorkar Jylla bad ka Sorkar Pdeng.
U la ong shuh shuh, “ki kheiñ ïa nga u Zero namarba ba ngam don spah don phew.”
U la ïathuh ruh ba ka jingïohlad jong u ban hiar leit jngoh ïa ki shnong ha ki District bapher bapher jong ka rilum Khasi bad Jaiñtia ka la pynpeiphang haduh katta ïa u ban ïohi ïa ka jingsyrtok jong ki paidbah nongshong shnong ha kaba ïadei bad ka jingbym poi hok ki song pynroi ba la mang da ka Sorkar Kmie.
“Lada ym don ka skhim MGNRES bun ki longiing kin ïap thngan,” ong u Bah Boney haba kynthoh ïa ka jinghiar ka ïoh ka kot ha ka Jylla Meghalaya haba ïanujor bad kiwei kiwei ki Jylla jong ka Ri India bad kiwei pat ki jylla jong kane ka thaiñ Shatei Lammihngi ka ri India.
Haba kynthoh ba ka jaidbynriew Khasi naduh u snem 2013 haduh mynta kam shym la lah satia ban pynmih ïa u Ophisar IFS, u Bah Boney uba la shongthait ruh na ka kam IFS u la ong, “ka daw baroh ka dei namarba ka pule puthi ka la phiel ha baroh ki liang. Namarkata, ngi donkam ban pynkylla ïa ka pule ka puthi ha ki nongkyndong,” u la ong.
“Lada nga jop ngan hap ban leh eiei halor ka pule puthi bad ngan ïakhun ruh ïa kane ka elekshon da ka jingieid kaba u paidbah un ai ïa nga,” u la ong.
U President ka KHNAM, u Bah Adelbert Nongrum, haba bynrap halor kane, u la ong, “ki paidbah ha kane ka kynti kim dei satia ban shah ïalam bakla bad kumba ka paw, ka MDA ka kwah ïa uta u kyrtong monlang hynrei ka long kaei kaei pat kaba sngewsih ba kim (seng saiñpyrthei ba ïatreilang ha ka Kynhun MDA) ju ïakren ïa ki ishu kiba ïa monlang.”