Press "Enter" to skip to content

Hikai ka KVK halor ka rep tynrai bad ri jingri

Jowai, Lber 17: Ka ophis Krishi Vigyan Kendra Jaiñtia Hills District ha ryngkat ka jingiatreilang bad ka Meghalaya Agricultural Management & Extension Training Institute (MAMETI) bad ka National Institute of Agricultural Extension Management kala pynlong ïaka jingai jinghikai kaba hynriew sngi lynter kaba hap hapoh ka Skill Training of Rural Youth.
Kane ka jingai jinghikai kala long naduh 11 tarik u Lber haduh 16 tarik ha ka shnong Wahiajer bad Pynthorlangtein kiba hap haka Thadlaskeiñ bad Amlarem Block.
Ïa kane ka jingai jinghikai, la hikai ïaki samla ha thain nongkyndong ban kin shim ïaka kam rep kam riang kum kawei na ki lad ban kamai kajih bad ban ieng hala ki jong ki kjat. Ka jingai jinghikai kalong haki lai bynta (batch) bad ha kawei ka batch ki don 28 ngut ki samla.
Ha kane ka jingai jinghikai la hikai kumno ban ïakhun bad ban ïada ïaki khniang kiba pynjulor ïaki jngthung ne jhur kaba tip kum ka Integrated Pest Management in Vegetables kaba ka kong R W Rangad, SMS Plant Protection kala ai jinghikai ha Wahiajer.
Ka rep tynrai ne ka Organic farming la hikai da ka R Lyngdoh, SMS Agronomy bad halor ka kam ri jingri Sniang da u Dr. R Suchiang, SMS AH & Vety ha Pynthor Langtein, Amlarem Block.
U Dr. D Pasweth, Senior Scientist & Head KVK Jaiñtia Hills ula ban jur halor ka jingdonkam ban pyntbit ïaka sap haka kam rep, kam ri jingri bad kiwei kiwei bad pynshlur ïaki samla ban phai khmat sha ka kam rep kam ri jingri ban long ki nongseng kam.
Ha kane ka jingai jinghikai ka KVK la pynlong kumba hikai ha skul ïaki nongrep bad la sam ïaki kot ki sla nalor ban pyni da ka kam ïa kaei kaba ki samla ki ïoh jinghikai.