Press "Enter" to skip to content

Ïoh mynsiem ka Congress ha Ri-lum Garo ba wan pynïasoh ki nongïalam saiñ pyrthei

Shillong, Lber 17: Ka Indian National Congress (INC) kala ïoh mynsiem bha mynta ban jop ïa ka elekshon MP-Lok Sabha na Tura Parliamentary Constituency, da ka jingwan pynïasoh palat spah ngut ki nongïalam na ki seng saiñ pyrthei bapher bapher sha ka Party hynnin ka sngi.
Ka Congress kala pynlong ïa ka jingïalang kaba heh bha ha Resubelpara ban pdiang burom ïa kine ki 100 ngut kiba wan pyn ïasoh ban ai jingkyrshan ïa u Myntri Rangbah barim ka Jylla Dr Mukul Sangma ha ka elekshon Lok Sabha ban long ha ka 11 tarik Ïaiong.
Ïa kine ki Nongïalam saiñ pyrthei la pdiang burom da u
Secretary ka All India Congress Committee u Zenith Sangma uba dei ruh u MLA ka Rangsakona ha ka jingiadon ryngkat u President ka MPYC u Richard Marak, u MLA ka Mendipathar Marthon Sangma, u MLA ka Chokpot Lazarus Sangma, u MLA barim Cherak Momin bad kiwei kiwei ki nongïalam jong ka Party.
Ki Kyrtong ka NCP ba ïakhun ha ka elekshon MLA ba dang shu dep na Resubelpara bad Kharkuta, u Dr Tweel Marak bad Priyam Sangma bad arngut ki kyrtong shimet Starline Momin bad Tengrak Marak, kila wan ban pynïasoh lang sha ka Congress bad pynpaw ïa ka jingkyrmen ba ka Congress kan jop da kaba suk ha ka elekshon Lok Sabha na Tura Parliamentary Constituency.
U Zenith Sangma haba pynpaw ïa ka jingkmen ban pdiang ïa kine ki Nongkitkam ba thymmai jong ka Party ula ong “Ha kine ki khyndiat snem bala leit, da ki spah ngut ki briew ha bun ki Jylla kila pynïasoh sha ka Congress. Ki paid Garo kim dei shuh kiba biej bad u Conrad um lah shuh ban shu ïalehkai bad ki paidbah ba lui lui jong ka Meghalaya”.
“Baroh ki dei kiba la nang la stad mynta bad baroh ki tip ïa ka riti sysnhar ka Ri bad ïa ka hok jong ngi. Ngi lah ban ïohi mynta ïa ka jingpyrshah jong ki paidbah ïa ka BJP bad ka NPP” ong u Zenith haba kyntu ïa ki paidbah ba kin pyrkhat bha na ka bynta ka jingbha jong ka Ri-lum Garo bad ban jied ïa u Dr Mukul Sangma kum u MP jong ki.
U President ka MPYC u Richard Marak ula kren halor ki polici jong ka BJP kiba long pyrshah ïa u paidbah, kiba dei ruh ki daw bah ba sa pynlong ïa kiba bun ki nongïalam ban phet na ka BJP bad ban pynïasoh sha ka Congress.
U Richard u ong ba ka BJP kala ïoh bsuh khlieh hangne ha Meghalaya lyngba ka NPP bad u Conrad Sangma bad ka sienjam ban ïaleh pyrshah ïa ka BJPP ka dei tang ban nym vote shuh ïa ka NPP ba kan wan ha ka bor hapoh ka Jylla.
“Tang ka Congress Party kaba lah ban ïakhun pyrshah ïa ka BJP ha ka Sorkar Pdeng bad kane ka dei ka kynti ban pyllait ïa ki paidbah na ki polici ba pynsniew jong ka BJP” ong u Richard.
Ki Nongïalam saiñ pyrthei ba pynïasoh Congress kila kyntu ïa ki paidbah ba kin jied ïa ka Congress ha kane ka kynti ba mynta haba ong ba dei tang kane ka Party kaba la trei shisha naduh ka mynsiem na ka bynta ki paidbah ka Ri Lum Garo.