Press "Enter" to skip to content

Lahduh u Marshall Pariong ïa ka jingïakop siat khnam ha Mawkyrwat

Mawkyrwat, Lber 17: U bah Marshall Pariong na Wahsiej Union Sports and Cultural Club u la long uwei na ki nongjop ha ka jingïakop siatkhnam ba la pynïaid da ka Archery Committee jong ka Mawkyrwat District Sports Association ha ryngkat ka jingïatreilang bad ka office jong u District Sports Officer, Mawkyrwat ha kaba la wan ban plie pyrda da u bah R. Kharbihthiew, Block Development Officer, South West Khasi Hills District, Mawkyrwat.
Ha ka jingkren jong u bah R. Kharbihkhiew kum u kongsan u la ong ba ki samla bad ki hep kiba rit ki donbok shibun eh ba ki im ha kane ka juk kaba mynta ha kaba wat ka sorkar ruh ka ai ïa ki lad ban pynmih ïa ki sap ba ki khynnah ki don ym kum mynshwa ha kaba ki sap ki phong ki shu lehnohei namar khlem ïoh ka lad. Shuh shuh u la ong ruh ba ki paidbah ha kine ki dong ki donbok ba ki dang don ki jaka ba ki lah ban pyndonkam kum ka jaka kilan met ym kum ha sor ba la khapngiah lut ki jaka. “Ka siatkhnam kam dei tang ka kam ban siatmrad kumba leh ki mynshwa hynrei mynta ka lah dei kawei na ki lad kamai”, ong u bah Kharbihkhiew da kaba bynrap ruh ba kadei ka dustur jong ngi naduh mynshwa kaba long kum ka lad ban pynim ïa ngi. U la ong ruh ba ki briew jong ka jaitbynriew jong ngi ki long kiba rit ha ka bormet borphad kumta u la kyntu ban ïaleh ban pynleit jingmut ha kane ka kam ïalehkai ka bym da donkam eh ïa ka bor met ban pynlut por khnang ba ngin nang mih shakhmat ha kane ka kam. “Ha ka district jong ngi ngi la don ki nongmareh ngi donkam sa ïa ki nongsiatkhnam” bad buh ruh ka jingkyntu ïa ki ‘rangïalehkai ba kin nym don ka jingsngew sarong, bad ba kim dei ban ngop ha ki jingthala namar kane kan pyntroiñ ïa ki hynrei kin treishitom, shimkhia khnang ba kin nangpoi sha thong. U la ong ruh ba kum ki nongïalehkai kim dei ban ïalehkai ïa baroh ki jait jingïalehkai hynrei kin pyntbit tang ïa kawei kawei ka jait jingïalehkai khnang ba kin poi sha ka thong ka jingjop.
Ki nongjop ha kane ka jingïakop ki long ha ka Individual men kaba 30 Meter la rah da u bah Marshall Pariong, Wahsiej US&CC, bah Libarles K. Sohphoh, Wahsiej u la wan ha ka kyrdan kaba ar bad u bah Heiman thyrniang, Thangrai u la wan ha ka kyrdan kaba lai. Ha kaba 20 meter ba nyngkong u bah Tendra K.Jahrin, Laitlawsnai SC, ba-ar u bah Marshall Pariong, Wahsiej bad balai u bah Libarles K. Sohphoh, Wahsiej.
Ha ka liang jong ki kynthei ha ka 30 meter ba nyngkong ka Andrica Nongsiej, Mawten SC, ba-ar ka Ribiangshisha Nongsiej, Mawten SC bad ba-lai ka Rihunshisha Nongsiej, Mawten SC. Ha kaba 20 meter pat ba nyngkong ka Andrica Nongsiej, Mawten, ba-ar ka Rihunshisha Nongsiej, Mawten bad balai ka Ribiangshisha Nongsiej, Mawten SC.
Ki nongjop ha ka Over-All Champion men 30 bad 20 meter ba nyngkong u bah Marshall Pariong, Nongsiej, ba-ar u bah Libarles K. Sohphoh, Wahsiej bad balai u bah Tendra K. jahrin, Lait-lawsnai. Ha ka Over-All champion 30 bad 20 meter ba nyngkong ka Andrica Nongsiej, Mawten SC, ba-ar ka Rihunshisha Nongsiej, Mawten SC bad balai ka Ribiangshisha Nongsiej, Mawten SC. Ha ki liang ki kynhun jong ki shynrang pat la rah da ka kynhun Wahsiej union Sports & Cultural Club, ba-ar ka Laitlawsnai Sports Club bad balai ka Thangrai Sports Club.
Ha kane ka sngi la pynïaid ïa ka jingïalang da u bah Moonliroi Lyngdoh, Vice President Cum Chairman Archery Committee, MDSA, la ïoh ka jingkren na u bah P. Wanniang, General Secretary ka MDSA bad ka jingkren khublei na u bah Bahaman Lyngkhoi, Secretary Archery Committee.