Press "Enter" to skip to content

Phet seng lut ki Nongïalam ka BJP ha EGH ba ïai kyrshan ïa ka NPP

Shillong, Lber 17: Ka seng Bharatiya Janata Party (BJP) kala nang troiñ mynta ha Ri-lum Garo hadien ka jingiehnohkam paidbah jong ki Nongïalam bad Nongkitkam ka Party ha East Garo Hills kiba bitar shla ba ka Party ka ai ka jingkyrshan ïa ka National Peoples Party (NPP).
Kane ka jingiehnohkam paidbah kaba jia hynne ka sngi U Blei, kala jia ruh namar ka jingpynslem ban pynbna ïa ka jingai ticket bad ka jingbym pynïeng kyrtong sha ka elekshon MP-Lok Sabha na Tura Constituency ka ban long ha ka 11 tarik Ïaiong.
Napdeng kine kiba iehnohkam ki kynthup ïa u President ka Mandal Committee u Kullen Sangma, ka President ka Mahila Morcha Serola Sangma bad u President ka yuva Morcha Charles Sangma. Kine ki laingut ki Nongïalam kila pynwai noh ruh ïa ki Committee ba ki khlieh hi .
Kine ki laingut bad ki nongbud jong ki, kila aiti ïa ka shithi iehnohkam sha u President ka BJP East Garo Hills bala phah copy ruh sha u President ka BJP-Meghalaya hynne ka sngi.
Kine ki Nongïalam bad Nongkitkam ka BJP, kila pynpaw ïa ka jingbitar ba ka BJP ka dang bteng ban ai ka jingkyrshan ïa ka NPP haba ong ba kane ka Party ka dei kaba bamsap tam, ba rhah bad kaba arsap haduh katta katta.