Press "Enter" to skip to content

Pynhap pyrda ka SWKHD ïa ka 1st Open Chess Championship

Mawkyrwat, Lber 17: Ka South West Khasi Hills District Chess Association ryngkat ka jingïatreilang bad ka Meghalaya Chess Association (MCA) ka la pynhap pyrda noh ïa ka 1st SWKHD Open Chess Championship ha kaba u bah Bonney Jones Kharbani, President jong ka Meghalaya Chess Association ula long u kongsan ha ryngkat ka jingïadonlang u bah Nobleman Wanniang, Treasurer jong ka MCA bad u bah Rijied Katrai uba dei u nongïalehkai chess ba ju mihkhmat ïa ka jylla.
Ha kane ka jingïalehkai, ha ka open category ía ka nam lahduh la rah da u J. Jobert Lyngdoh na ka shnong Maw-langwir, ïa ka kyrdan ba ar la rah da u Andesson Lyngkhoi na ka shnong Mawten bad ïa ka kyrdan ba lai la rah da u Banshanbor Marngar na ka shnong Maw-kyrwat. Katba na ka liang ki khynnah skul pat, ïa ka nam lahduh la rah da u Adrian Mars Syiemlieh na Little Star Higher Secondary School uba dang pule klas V bad uba long ruh u nongïashimbynta ba dang khynnah tam ha kane ka jingïalehkai,ï ka kyrdan ba ar la rah da u Jefferson Marngar na Maharam Govt Higher Secondary School uba dang pule klas X bad ïa ka kyrdan ba lai la rah da u Bryan Lewis Jyrwa na Maharam Govt Higher Secondary School uba dang pule klas X.
Na ka liang jong u kongsan ha ka jingkren jong u, ula ai mynsiem shibun ïa ki nongiashimbynta, khamtam eh ïa ki khynnah skul ban nang ïashim bynta ha ki jingïalehkai bapher bapher ki ban sa pynlong hapoh ka jylla bad shabar ruh. Ula ong ruh ba don shibun ki khynnah napoh ka district kiba tbit bha ha ka jingïalehkai chess. Ula kyntu khamtam ïa ki khynnah skul ba kin don ka jingsngew-tynnad ïa kane ka jingïalehkai namar ka ïarap shibun ïa ka pyrkhat pyrdaiñ bad ha ka pule-dangle. Shuh shuh ula ong ruh ba nangne shakhmat, ka MCA kan sa pynbeit ïa ka Coaching Camp hapoh SWKHD ha ryngkat ka jingïatreilang bad ka SWKHDCA.