Press "Enter" to skip to content

Rung final ka Meghalaya Police FT ha ka V MIFT jong ka Mawten SC

Mawkyrwat, Lber 17: Ka kynhun ïalehkai jong ka Meghalaya Police Football Team ka la rung sha ka final ha ka lympung football jong ka V Mawten Invitational Football Tournament 2018-19 ba la pynlong ha madan Mawpyllun Mini Stadium Mawten.
Ka jingïoh rung jong ka Meghalaya Police FT sha ka final ka dei hadien ba ka la pynliem noh ïa ka Eastern Pirates FC da 3 – 1 ha kaba ka jingïalehkai ka la long kaba itynnad bad shongshit bha. Haba phai ha ka jingïalehkai jong ka kyllastep ka long kaba shongshit bha ha kaba baroh ar liang mamla ki la pyni ïa ki sap ïalehkai kiba itynnad bha lyngba ka jingïoh ïa shibun ki kabu ban thep kol bad ka jinglah jong ki ban ïa pashad bol nadien shakhmat. Hynrei haba phai sha ka Eastern Pirates FC ka la kham ïoh bun ki kabu ksiar lyngba ki corner kicks bad ki free kick, hynrei kam shym la lah ban pynkhih ïa ka jar bad dei tat ha ka minit kaba 32 ba u Ambrose Syngkli jong ka MLP FT ula ïoh ban rah ïa ka bol bad thep jlang shapoh ka kol bad pynlong ïa ka MLP FT ban tam da 1 – 0 kol ha ka kyllastep.
Haba wan biang ha ka jingïalehkai jong ka kyllamiet, ka Eastern Pirate FC ka la sdang ban ïalehkai kham bha bad ñion shakhmat ïa ka bol da kaba thmu ban ïoh ban pynïakhaid hynrei bun ki jingpyrshang kim shym la urlong satia namar ka MLP FT kam shym la ailad. Hynrei hapdeng ka ka jingïaleh ka MLP FT ka la ïakhun tyngeh bad pyrshang ban ïalehkai bha ha kaba sa shisien ha ka minit kaba 59 u Teibor Siangshai ula ïoh ban khyrwit ïa ka bol ha kaba u nongapkol jong ka Eastern Pirate FC u khlem lah shuh ban leh ei ei ha kaba ka bol ka la rung syndon haph ka kol.
Hadien ki ar kol jong ka MLP FT, ka Eastern Pirate FC kam shim la duh mynsiem hynrei ka la pyni shisha ïa ka mynsien ïa khun bad ha ka minit kaba 69 u Richmon Biam ula ïoh ban thep ïa ka kol kaba itynnad bha ban ai mynsiem ïa ka kynhun baroh kawei ha kaba ka la nangïai pyrshang shuh shuh ban ïoh ban thep kol hynrei bun ki jingpyrshang ki long leh noh ei. Haba la kut ka regular time na ka liang u nongpynïaid ula ai por biang bad hadien ka jingai por ka MLP FT ka la ïoh thep biang ïa ka kol kaba lai ha ka minit kaba 90+10 lyngba u Raja Shadap kaba pyntikna syndon ïa ka MLP FT ban ïoh rung sha ka final jong kane ka lyngpung.
U ‘rangïalehkai uba paw bha ha kane ka jingïalehkai semi final u dei u Teibor Siangshai jong ka MLP FT ha kaba u bah Franklin Shylla uwei na ki rangbah ba pawkhmat jong ka shnong Mawten ula ïoh bna sam.
Ka jingïalehkai final jong kane ka V Mawten Invitational Football Tournament 2018-19 kan long ha ka 23 tarim u Lber, 2019 ha kaba ka kynhun kaba khlaiñ bha ka United Umsing Sports Academy kan ïa khun pyrshah ïa ka Meghaya Police FT ha madan Mawplyllun Mawten ha ka por 1 baje nohphai sngi.