Press "Enter" to skip to content

Shisnem ka jingïaid lynti ka MDA: Ym myntoi satia kaba synroplang bad ka BJP

Ka Sorkar MDA hapoh ka jingïalam ka NPP kala dap artad shisnem kynthih ha kine ki sngi kiba la lah, hynrei kam don satia kano kano kaba thymmai ba kane ka sorkar kala sdang. Haduh mynta kat kiba kane ka sorkar ka plie-paidbah ki dei kiba la sdang da ka sorkar kaba hashwa ñiuma kata kam dei kaba phylla, hynrei kane ka sorkar kan hap ban trei borbah ba kan lah ban pynpaw pyrthei ïa ki kam jong ka.
Lah ban ong ba kawei na ka jingjop jong kane ka sorkar synrop ka dei haba ka lah ban jop haki elekshon sha ki artylli ki Autonomous District Council, kata ha ka Khasi bad Jaiñtia Hills Autonomous District Council. Hadien jong ka elekshon la lah ban thaw ïa ka EC kaba thymmai da ki seng saiñhima sima kiba synroplang haka sorkar MDA, hynrei ka jingkylli ka long nalor kata kaei pat kaba kane ka sorkar kala leh? Lane kaei ka jingkylla kaba kine ki EC kin lah ban wan rah ha ki san snem kiban sa wan?
Dashisha lah ban ïa kubur lang ba kam dei kaba suk ban ïalam ïa ka sorkar synrop bad lah hi ban sngewthuh ïa ki jingeh kiba u Myntri Rangbah ka jylla u Conrad K Sangma u ïakynduh, haba u ïalam ïa ka sorkar. Hynrei ka jingshisha kaba ym lah ban len pat ruh ka long ba ki seng kiba ïasynroplang haka sorkar ki ai ka jingshaniah bad ka jingkyrshan kaba pura ïa ka sorkar hapoh ka jingïalam jong u Conrad. Namar kata lada kane ka sorkar kam lah ban poi sha ka thong, ym lah ban kynnoh ïa ki seng ban ïasynroplang hynrei tang ïa u Myntri Rangbahduh ka jylla hi.
Ha kajuh ka por kane ka sorkar ka dei ruh ka sorkar kaba la ïasynroplang bad ka seng BJP kaba long ka seng kaba ïalam ïa ka jingsynshar haka ri baroh kawei, hynrei balei pat ba kane ka sorkar ka dang kyrduh pisa? Haka jingshisha ka jingkynthuplang ïaka BJP haka sorkar ruh ka dei hi ka jingthmu ban ïoh ïa ka jingïarap bad ka jingkyrshan na Delhi, phewse kam long pat kumta.
Dashisha u Conrad u kren shaphang kita ki mission kum ki Mission Tit, ki Mission sohphan, ki Mission ri jingri, hynrei ym pat paw dak pat ban i kumno kine ki mission ki treikam. Ha kaba ïadei bad ka Mission ri jingri u Conrad u kren ruh shaphang ka kam ot-doh bad ka kam pynwandur thymmai ïa ki jaitdoh kiba bun (meat processing), hynrei wat ha kaba ia dei bad kane ruh haduh kine ki sngi, ka dang long tang ka jingsawa lyngba ki tynghung. Ka jingshisha ka long ba ka sorkar jylla hi kam pahuh pisa satia, namar kiba bun ki daw.
Wat ha kaba ïadei bad ka kam shangkai pyrthei (tourism) ruh ym pat i satia ba ka sorkar kan leh eiei halor kane. Haka jingshisha wat ka 200 klur tam kaba ka sorkar kmie kala ai na ka bynta ban kyntiew ïa ka kam jngohkai pyrthei hapoh ka jylla ruh, kane ka sorkar kala shu sam kumba sam doh kyndang khlem da wad jingtip ba thikna ne khlem da leh ki jingwadbniah ba biang shwa ban sam ïa ka pisa. Ka jingai bynta ïa kane ka pisa ka long tang da kaba shu khmih nalor khlem da tip pat la kan lah ne em ban pynmyntoi shisha ïa ki paidbah kiba don ha kane ka jaka bad ban pynroi ïaka kam shangkai pyrthei hapoh ka jylla.
Lah ban ong ba ka sorkar MDA kaba la ïalam da ka NPP ymtang ba kala pynsyrwa ei ïaka por shisnem kaba kala shimti ïa ka jingsynshar haka jylla, hynrei kaba kham kongsan ka long ba kala pynlehnohei ïaka jingïajan ba ka don bad ka sorkar ha Delhi. Kumba paw ba kane ka sorkar jylla kam da pahuh pisa eh ban sdang ïa kino kino projek thymmai namar kata, kane ka mut ba ka khlem ïoh jingkyrshan pisa kaba biang na ka sorkar Delhi. Namar kata ka long lehnohei ka jingai jingkyrshan ka NPP ïa ka BJP haka sorkar ha Delhi, namar ba ka sorkar MDA ka khlem myntoi eiei ruh em na kata ka jingïadei.
Ka sorkar MDA ka ïoh jingmyntoi tang ïa kito kiba long ki central scheme kumba ïoh lem ki sorkar jylla ha kiwei pat ki jylla kiba synshar da ki bym dei BJP. Katba ki sorkar jylla pat kiba synshar da ka seng BJP ki kham ïoh jingmyntoi khambun ban ïa ki bym dei BJP. Ka long lehnohei namar kata ïa ka NPP ban kan ïasynroplang bad ka BJP hapoh ka jylla bad ba kan ai ka jingkyrshan ïa ka sorkar NDA ha Delhi.
Ka jingshisha ka long ba lada kane ka sorkar kam lah ban leh eiei ha kine ki khyndiat sngi, kan kut khlem don kano kano kaba ki briew kin ïoh ban pyrto ïaroh ïa ka. Ka jingshisha ka long ba ym don ba lah ban ïathuhlypa kaei kaban jia hadien ka ilekshon MP, bad lada ka BJP ka wan biang haka jingsynshar, kane ka sorkar kan lah ban neh, hynrei kumba ju long hi lada ka sorkar kan kylla ha Delhi hadien jong ka elekshon, kata ka mut ba ki sngi jong kane ka sorkar ruh kila jan kut artad.
Ka jingshisha ka long ba ym don ban tip aiu ne kaei kaban jia hadien jong ka elekshon sha ka ïingdorbar Lok Sabha kaba 19 bad kaba mih na kata ka lah ban wan rah ïa ka jingkylla haka jylla. Ka jingshisha ka long ba lada kylla ka sorkar ha Delhi, khlempep kan kylla ruh haka jylla bad kata ka long ka jingkut ïaka sorkar MDA hapoh ka jingïalam jong ka NPP. Namar kata kane ka sorkar MDA hapoh ka jylla ka don ha thmier jong ka riat bad ka jingïada ïaka ka long tang lada ka sorkar NDA kan ïoh biang ïa ka jingsynshar ha Delhi.