Press "Enter" to skip to content

To kad ïa la ka dohnud ym ïa ka jaiñkup hakhmat jong u Blei: Rev R.H.Lyngkhoi

Khliehriat, Lber, 17: U Rev. RH Lyngkhoi haba kren ha ka jingïaseng Synod ha Lumshnong, East Jaiñtia Hills District u la pynshong nongrim ïa ka jingkren na ka Kitab u Joeel, kaba ong, “To kad ïa la ka dohnud ym ïa ka jaiñkup hakhmat jong u Blei….” bad na ka Kitab u Esra 9:3 kaba ong, “Ki briew ki la kham ïa ieid ïa ka jingdum ban ïa ka jingshai naba ki long bymman ki jingleh jong ki,” bad na ka Kam jong ki Apostol 14:14 kaba ong, “Kane ka long ka jingkad ïa ka donnud da ka jingsngewrit.”
Ha ka jingïaseng kaba ar, u Rev.PL Gadew,u Moderator Elect jong ka KJP Synod Sepngi u la ban jur halor ka jingpyndem ki briew ha kiei kiei kiba sniew. “Ka pop pyndem bym dei kaba pynïasuk ïalade bad kaei ka bym dei ka ban lam sha ka ban jot.”
U la ong ba don bun ki briew kiba riewblei hynrei kiba len noh ïa ka bor jong ka. U la pashat jingmut ruh halor ka jingpyndem khlem nongrim ki kmie ki kpa ha la ki jong ki khun ha kaei kaei kaba sniew namar ka jingsheptieng ïohba ki khun kin phet noh na iing.
U la ong ba donkam ruh ïa ki kmie ki kpa kin ïalam ïa la ki khun ha ka lynti ka jong u Trai ym ban hikai ïa ka da la ka jong ka bor. “Kawei ka jingeh ha ki longiing longsem ha kane ka juk ka long ba ki buh ïalade ha ka jaka ka jong u Blei,” u la ong.
U la kren sani ruh ba ki briew ki pyndem bymdei ïalade ha ka shongkha shongman kaba don ka jingïatan tyllai ha kaba ka tarajur ka ju noh beit sha ka.liang kita kiba don ka spah bad ka kyrdan. U la kren ruh halor ka jingbamsap ki shakri paidbah, ki shakri sorkar, ki seng bapher bapher da kaba u la ai nuksa ïa ka jingbam pisa ha ka por Election. “Kum ki bangeit phim lah ban shakri ar kynrad bad phim lah ban shakri ïa u Blei bad ka spah.”
U la pynkynmaw ba kumno u Daniel lem bad ki paralok ki la kyntait ban mane ïa ki blei thaw bad u kyntu ruh ba kum ki bangeit kim lah ban shakri ïa ka spah bad ïa u Blei.
La pynshongkun ïa kane ka sngi da ki jingrwai Choir na ka Iew Pamtiah, Balang Sawmer, Balang Lumshnong, na Synod Choir KJP Sepngi bad kiwei kiwei.