Press "Enter" to skip to content

Ka Samoi jong ka jingkyrduh um

Ka samoi jong ka jingkyrduh um, ka la sdang ba kan wan ban iuh kjat ha kane ka jylla, hadien ba la leit noh ka aiom tlang, ha kaba ki lum ki wah, ki tyllong um baroh kiba la kyrsoi, mynta ki la sdang ban rngiat bad tyrkhong namar ba ka aiom slap kam pat dei satia ka por ka jong ka ba kan wan, ha kim kane ka por, kat shaba ïa phai, la shem bad iohi ba ki wah bah haduh ki wah rit, ki tyllong um kiba juh kyrsoi bha, ki rang rkhiang lut bad ka jingeh kaba wan mih ka di pat ïa u khun bynriew, uba ka um ha kum kane ka por kaba mynta ka dei kaba kordor bad bym lah ban leh pahuh satia ïa ka.
Haba phai sha la ka jong ka jylla, la tip shai kdar naduh ka snem ba la leit ba ka jingioh duna bha jong u slap kan wanrah jingeh ïa u paidbah ban ioh ïa ka umbam umdih kaba pahuh pahai, namar ha ka aiom lyiur, lada u slap um wan kumba u dei ban wan, ki tyllong um dih kiba kyrsoi na sla jong ka mei ramew, kim lah ban kyrsoi bun palat bah ka um, namar ka jaka kaba ki um baroh ki tuid bad ki lang, ha ki jaka kynshew ba shapoh ka sla khyndew, ki kloi ban rngiat noh ha ki.
Hynrei ka jingeh kaba pynkha roi shisha ïa ka jylla khamtam lei lei ïa ka nongbah Shillong ka long katba nang mih ki snem, u bynriew u la ïai kha roi ha kaba u donkam ban thaw ïa la ki ïing ki sem ba un ioh ban rieh tngen, dei ha ka jingsdang ban kha roi palat jong u bynriew bad ka jingsdang ban bun bha u nongwan buhai shnong na kiwei pat ki jylla ba marjan bad na ka ri, ka pynlong ïa ka jylla bad khamtam ïa ka nongbah ba kan mad ïa ka jingeh ban sdang duna bha ka um.
Ha kiba bun lei lei ki shong ki thaw ne ki dong ki kyntoit jong ka nongbah, ka jingduna jong ka umbam ka umdih ka long jan baroh shi aiom jong ka snem, namar ba kita ki jaka pyllang ne kynshew um ba la tei ne shna da ki bor sorkar kim lah shuh ban pyndap ïa ka jingdonkam ka jong u paidbah ba la bun palat liam, ha kum kine ki por, kat shaba phai, nalor ba rang ryngkhiang ka bneng, la shu sma kynjing lut kat shaba phai, namar ki nur kiba kit ïa ki jaboh ki sahkut sah hajuh tang namar ka um kaba kit bad bah ïa ki sha ki wah bah, ka la duna bha.
Ka jingbun briew jong ka nongbah, ka pynlong ïa u ba un skut ïa ki jaka kiba dei ki tyllong um kiba juh bsa ne btiah ïa ka jingdonkam jong u para briew, namar ha kane ka juk hiran bha jong ka jaka, u briew um kheiñ snep ne ban don kattta ka jingsngewthuh kumno ba un nang ban tyngkai ïa ki tyllong um, pynban ka jingim kaba pihuiñ bad kaba kwah rhah tang ban biang ka shi met ka synshar ha u briew, katno tam lei lei haba wan khie kynsan ka spah ka phew, u skut bad tei ki ïing paki ki ïing dulan, u da ksam ne ban ngam jylliew bha ïa ki tyllong um tad haduh ba ka um da ka jingbym banse ka hap ba kan kdat noh sha kiwei pat ki jaka kiba ka lah ba kan lum ban kynshew ne ban pyllang khnang ba kiwei pat ki para briew kin lah ban ioh pyndonkam ïa ka.
Nangne shakhmat la tip ba u paidbah uba bun balang un sa shu lynniar bad kyang shla namar tang shi tyndong ka um ruh kan long shisha kaba eh ba un ioh ban tong na ki kor um bam ba la pynbiang da ki bor sorkar, katno tam lei lei haba ki wahduid ki shyngiar kiba juh ïai kyrsoi ia ki um ba bang bad ba shngiam, ki la rngiat lut ne ba kin shu jaw tok tok, kaba ha kum kane ka khyllipmat, u briew un poi shaduh pud ba un hap ban ïa mai ban ïa ñia bad la ki para briew ba ïa im ia shong ryngkatia sah ryngkat ne bad la ki marjan ki marpa, tang namar ka jingïaknieh ïa ka um.
Shuh shuh ka jingkyrduh jong ka umbam kam kut tang ha kum kane ka aiom rkhiang, pynban kumba la kdew haneng kiba bun ki dong ki shong ne ki kyntoit kiba don ha kane ka jylla, ki la mad bha ïa ka jingsdang ban duh kiba bun tylli ki tyllong um, ba la juh ïai kyrsoi ha ki sngi bad ki snem kiba la leit noh, namar ka jingbym don lem ka jingkit khlieh ban pynneh ïa ki khlaw ki btab, ïa ki rud nong ba kyrsoi bha ki tyllong um dih, mynta ki sdang ban kylla long kum ka kynja jingtim ha ka kiba bun ki briew, kiba dei na ka jingleh ba khlem akor ka jong ki ban pom dusmon ïa ki dieng ki siej ka jingbym lah ban pynneh ïa la ki khlaw ki btab ka wanrah ïa ka jingkyrduh jong ka um.
Ban shu ïakren ïa ka jingshisha, ka um ka dei ka dawai bah ha ka jingim ka jong u briew, uba lehse u lah ban im bun bun ki sngi khlem ki bam, hynrei khlem ka um da lei lei un nym lah ban im satia, namar dei ka um kaba lah ban pyntngen ïa ka jingsliang ne thrang ha ka met, ka um kaba donkam ban shet ban tiew ïa ka bam kaba man la ka sngi, dei ka um kaba ïarap ban tylliat ïa ka bam kaba u briew u bam, nalor katta ka um kaba lah ba kan sait ne pynkhuid ïa ka jaboh na ka met ka jong u briew ha ka dur jong ka sum ka sait.
Kumta ka la long kaba donkam ba u briew un peiphang noh ïa ka jingeh kaba mynta u la sdang ba un mad ha ka jingim, ha kaba dei ban pynrung ha ka mynsiem shaphang kumno ban lah ban pynneh ïa la ki khlaw ki btap kiba kyrsoi ïa ki tyllong um bam um dih, u briew un hap ban thaw ïa ki adong ki adit ne ki aiñ ki kanun ban khanglad ïa kiwei pat ki briew ban nym tam palat sha u pud u sam ban tei ïing tei sem sha ki jaka ba marjan bad ki tyllong um bam um dih, ki shnong ki thaw, kin hap ban shim ha ki ïa ka jingkit khlieh ba lada dei makna ka jaka ki riew shimet, hap ban knieh ne kurup noh ïa kum kine ki jaka kum shi bynta ban lah ban pynneh bad ban pynsah ïa ki tyllong um bam ba ïai kyrsoi na ka por sha ka por.